जोनसन बेलायतया न्हूम्ह प्रधानमन्त्री जुइगु
लहना न्यूज | ने.सं. ११३९ दिल्लागा षष्ठि (२३ जुलाइ, २०१९), मंगलवाः
बोरिस जोनसन संयुक्त अधिराज्य बेलायतया न्हूम्ह प्रधानमन्त्री जुइगु जूगु दु ।
बेलायतया सत्ताधारी कन्जरभेटिभ पार्टीया नेताया नितिं जूगु चुनावय् जोनसनं त्याःगु दु । वय्कलं जेरेमी हन्टयात बुकादीगु खः । जोन्सनं ९२द्वः १५३कू मत कयादीगु खःसा हन्तं मुक्कं ४६द्वः ६५६कू मत कयादीगु खः । हन्ट टेरिजा मे सरकारया विदेशमन्त्री खः । आः जोन्सनं कन्हय् बुधवाः प्रधानमन्त्री पद लःल्हानाकयादी ।
ब्रेक्जिटयात कयाः यूरोपियन युनियनलिसे यायेगु सम्झौता संसदपाखें पास याके मफयेधुंकाः प्रधानमन्त्री में पार्टी नेतापाखें राजीनामा बियादीगु खः ।
थ्व हे झ्वलय् प्रधानमन्त्री में जोनसनयात भिन्तुना देछानादीगु दुसा ब्रेक्जिटया नितिं जानाः ज्या यायेगु नं धयादिल ।
Categorized in अन्तर्राष्ट्रिय
