झःझः धाल जगमोहन ‘वामि’या एकल साँझ ‘वामिया दबू’

७ गू दशकंनिसें संगीत व समाज सेवाय् समर्पित ८३ दँया जगमोहन ‘वामि’या एकल संगीत साँझ झःझः धाय्क क्वचाल । गादोवरी नगरपालिकाया ग्वाहालिइ गोदावरी साहित्य परिषदया ग्वसालय् जूगु ज्याझ्वः वाङमय शताब्दी पुरुष सत्यमोहन जोशीं उलेज्या यानादीगु खःसा ज्याझ्वलय् कलाकार ‘वामि’, ज्याझ्वःया संगीत संयोजक संगीतकार जूगल डंगोल व मूपाहाँ जोशीयात नं हंगु खः ।

 

राष्ट्रिय नाचघरय् जूगु ‘जगमोहन वामि एकल संगीत साँझ : वामिया दबू ज्याझ्वलय् १६ म्ये न्ह्यब्वःगु खः । ज्याझ्वलय् मूपाहाँ जोशीं कलाकार ‘वामि’या गुण व योगदानया चर्चा यानादिलसा सांसद नवराज सिल्वाल व गोदावरी नगरपालिकाया मेयर गजेन्द्र महर्जनं ज्याझ्वः जूगुया लसता प्वंकादीगु खः । ग्वसाः खलः परिषद्या नायः वशिष्ठ अधिकारी व मूल ब्यवस्थापन समिति संयोजक हरिराम महर्जनं नं थःथःगु नुगःखँ प्वंकादीगु उगु उद्घाटनया ज्याझ्वः नवराज सञ्जेलं न्ह्याकादीगु खः ।

उद्घाटनया ज्याझ्वः क्वचायेकालि जगमोहन ‘वामिं’ गणेश वन्दना न्ह्यब्वःसें न्ह्याःगु संगीत साँझ ज्याझ्वलय् निपुगु म्येकथं ‘वामि’नाप नीशा देसारया सलय् ‘नैंक्या हुका ल्हातं ज्वना’ न्ह्यब्वःगु खः । थुकथं हे जुजुकाजी रंजितं ‘मैं धाय्ला मय्जु धाय्ला’, संगीता शाक्य थापां मैंया महर्जनया सलय् रेकर्ड जूगु ‘साझवाः हाकुचा’, सानुबाबु महर्जनं योगेश वैद्यया सलय् पिदंगु ‘ज्ञानी मय्जु झीगु ख“ थौं’, कैलाश मेहेर कायस्थं रमेश ताम्राकारया सलय् रेकर्ड जूगु जगमोहन ‘वामिं’ं हे लसय् चिनादीगु लोकंह्वाःगु ‘म्हुतुइ छता मनय् छता’, ज्ञानु राणा, नीशा देसार व उत्तम महर्जनं रमेश ताम्राकार व ज्ञानु राणाया सलय् पिदंगु ‘उखें मलाः थुखें मलाः’  ‘वामि’या काय् डा. भाष्कर मोहन कायस्थं ‘यःमां छंगु गुणया पलेसा’, प्रताप दास, उत्तम महर्जननाप ‘वामि’या छाय् चैतन्य मोहन कायस्थं जूगल डंगोलं लसय् चिनादीगु ‘देशका सुपुत्र’ थ्वयेधुंकाःलि दबुलिइ पिलुवःम्ह जगमोहन ‘वामिं’ थःगु हे सगीतय् लोकंह्वाःगु ‘झिंन्यान्हु मानि ब्याः यायेगु’ न्यंकादिल ।

 

अनंलि भाजु ‘वामि’या हे लसय् सानुबाबु महर्जनं ‘जिमि कलाः तसकं हे भिं’ न्यंकादिलसा तारादेवीया सलय् रेकर्ड जूगु ‘चा हे मचाय्क’ नीशा देसारं हालादिल । थुकथं हे मदनकृष्ण श्रेष्ठ, उर्मिला शाक्यया सः दुथ्याःगु ‘छं दुःख स्यूगु खना’ मदनकृष्ण श्रेष्ठनाप नीशा देसारं न्ह्यब्वयादिलसा थुगु म्ये लिपा ख्यालि जुजु मदनकृष्णं ‘दँदँ दत मखनागु’ न्यकादीगु खः । विजयनारायण मानन्धर, संगीता शाक्य थापाया सलय् थ्वयाच्वंगु ‘भ्वय् वनाः’ म्ये संगीता शाक्य थापानाप सानुबाबु महर्जनं न्ह्यब्वयादीगु खः । 

 

‘वामि’या किजा मदन मोहन कायस्थ, रत्नमान, मैंया प्रजापतिया सलय् सलय् रेकर्ड जूगु लोकं ययेकूगु मेगु म्ये  ‘बागः मिखां स्वय्मते’ मदनमोहनया हे काय् कैलाश मेहेर कायस्थनाप उत्तम महर्जन, संगीता शाक्य थापा व नीशा देसारं न्यंकादिल । ज्याझ्वःया दकले लिपांगु म्ये कथं जगमोहन ’वामिं’ थःगु हे संगीतय् जीवन दर्शनं जाःगु म्ये ‘कति तिमी रमाई बस्छौ’ न्ह्यब्वयादीगु खः ।

 

सुरजवीर बज्राचार्यं न्ह्याकादीगु थुगु संगीत साँझ ज्याझ्वलय् ९ पु म्ये वामिया सांगीतिक जीवनया मू तिबः कृष्णमान डंगाेलया संगीतय्, ४ पु जगमोहन वामिया थःगु संगीतय्, छपु जूगल डंगोल व छपु लोक लसय् चिनातःगु म्ये न्ह्यब्वःगु खःसा स्वकुमिपिन्सं प्रत्येक म्येय् न्ह्याइपु तायेकूसें प्वंकादीगु लसतां ज्याझ्वःया ग्वसाः खलःया तातुना व कुतः ताःलाःगु परिषद्या नायः अधिकारीं कनादिल ।

 

थुगु ज्याझ्वलय् जूगल डंगोलया संगीत संयोजनय् मोहनकृष्ण कार्कीढली, नारायण दास, मनोहर सुनाम, मनराजा नकर्मी, अनुप दास, रविन कार्कीढली, किशोर कार्कीढली, लक्ष्मीप्रसाद डंगोल, सुन्दरकुमार महर्जन, प्रज्वल लामा, विकास सुनुवार, भूपेन्द्र बज्राचार्य, अमन माली, राजीव श्रेष्ठ, उजन डंगोल व रोशन महर्जनं वाद्यवादनय् साथ बियादीगु खः ।

 

Categorized in मनोरन्जन