२०८० चैत्र १५, बिहिबार

झिंप्यक्वःगु ज्यापु दिवस हनेगु नितिं पाःब्व लःल्हात ।

नृपेन्द्रलाल श्रेष्ठ | दिल्लाथ्व पुन्हि ११३७ (जुलाई ८ २०१७)

झिंप्यक्वःगु ज्यापु दिवस हनेगु नितिं पाःब्व लःल्हात ।ज्यापु संस्कृति विकास कोषं थौ छगू ज्याझ्वःया दथुइ गुरु पुन्हिया लसताय् मंकाः गुरु पूजा व ज्यापु दिवसया पाःब्वः लःल्हाय्गु ज्या जुल ।

 

झिंप्यक्वःगु राष्ट्रिय ज्यापु दिवस हनेगु नितिं दगु दापा खलः, नःबहाः, ब्रह्मत्वाःयात श्री कमलादी गणेश जमःमि गुथिया नायः राम महर्जनं पाःब्व लःल्हानादीगु खःसा येँ महानगरपालिकाया प्रमुख विद्या सुन्दर शाक्यं झिंप्यक्वःगु राष्ट्रिय ज्यापु दिवस समारोह समितिया कजि न्हुच्छे नारायण डंगोल (बम्र्हु)यात छगू लख तकाया चेक लःल्हानादीगु खः ।

 

कोषया नायः मंगल महर्जनया सभाध्यक्षताय् जूगु उगु ज्याझ्वलय् ज्यापु दिवस संयोजन सिफारिस समितिया कजि सन्तु महर्जन, झिंप्यक्वःगु राष्ट्रिय दिवस समारोह समितिया कजि न्हुच्छे नारायण डंगोल, ज्यापु महागुथिया नायः राजभाइ जकःमि, नारायण परिवार क्लबया नायः प्रचण्डमान बज्राचार्य, कोषया संरक्षक तीर्थराम डंगोल, महानगरपालिकाया प्रमुख विद्यासुन्दर शाक्यं थःथःगु नुगःखँ तयादीगु खः ।

 

उगु ज्याझ्वलय् ६३गू त्वाःया गुरुपिन्त मूपाहां विद्यासुन्दर शाक्यं तपुलि व कोषया दुजःपिन्सं ख्येँय् सगं बियाः हनेज्या याःगु खः ।

 

Categorized in राष्ट्रिय