झीम्ह प्रहरी नायब महानिरीक्षक (डीआईजी) य् बढुवा
लहनान्युज | चौलागा चतुर्थी ११४०, चैत्र २९ शनिवाः
गृह मन्त्रायल न नेपाल प्रहरीया झीम्ह वरिष्ठ उपरीक्षक (एसएसपी) यात प्रहरी नायब महानिरीक्षक (डीआईजी) य् बढुवा यायेगु सिफारिस याःगु दु ।
बढुवा जुपि मध्ये प्यम्ह ०४९ वैशाखय् भर्ना जुपि खः सा खुम्ह ०४९ चैतमा जुपि अधिकृतपि खः ।
नेपाल प्रहरीया वेवसाइटय् प्रकाशित सूची अनुसार बढुवा सिफारिसय् १ नम्बरय् घनश्याम अर्यालया नां दु वया लिपा प्रकाशजंग कार्की व वसन्तकुमार पन्त याःगु नां दु ।
इमिगु ब्याचय् शैलेश थापा क्षेत्री व हरिबहादुर पाल प्रहरी अतिरिक्ति महानिरीक्षक खः ।
दँच्छि लिपा भर्ना जुपि सहकुल थापा न्हापागु नम्बरय् बढुवा जुगु दु । थापा थौकन्ह्य महानगरीय अपराध अनुसन्धान महाशाखाय् ज्या याना च्वंगु खः ।
थापा स्वया न्ह्य महाशाखाय् नेतृत्व यानाच्वम्ह धिरजप्रताप सिंह दोस्रो नम्बरय् बढुवा जुगु खः । थुगु पुचलय् च्वम्ह विश्वराज पोखरेल वैशाख १९ गते हे डीआईजी बढुवा जुइ धुकुगु दु ।
सिंह लिपा वसन्तकुमार लामा, रविन्द्रबहादुर धानुक, उत्तमराज सुवेदी व अरुणकुमार विसी बढुवा सूचीइ लागु दु ।लामा व धानुक थ्व स्वया न्ह्य काठमाडौं प्रहरी प्रमुखया नेतृत्व यानादिं धुकुगु दु ।
