२०८० चैत्र १६, शुक्रबार

टि–ट्वेन्टी विश्वकपय् भारतं अफ्गानिस्तानयात बुकल

कौलागा त्रयोदशी ११४१, कात्तिक १७ बुधबाः

आइसीसी ट्वेन्टी ट्वेन्टी विश्वकप क्रिकेटय् भारतं न्हापांगु जित ल्हातय् लाकूगु दु ।

वंगु बहनी अफगानिस्तानयात ६६ रनं बु्काः भारतं सेमिफाइनल दुहांवनेगु सम्भावनायात म्वाकूगु दु । युएईया आबुधाबीइ जूगु कासाय् न्हापां व्याटिङ याःगु भारतं क्वःज्यूगु २० ओभरय् २ विकेट तंकाः २सः व १० रनया तःधंगु योगफल दयेकल ।

उकिया लागिं रोहित शर्मां ७४ अले लोकेश राहुलं ६९ रन दयेकल । लिसलय् २सः व ११ रनया आज्जु ल्यूगु अफगानिस्तानं २० ओभरय् ७ विकेट तंकाः सच्छि व ४४ रन जक दयेकेफत । थुृगु कासा त्याकूगुलिसें भारतं पुचःया स्वंगू कासां २ ल्याः मुंकूगु दु ।

थुगु पुलचय् ४ कासां ८ ल्याः मुंकूगु पाकिस्तान सेमिफाइनलय् थ्यनेधुंकूगु दु । अफगानिस्तान प्यंगू कासां प्यंगू ल्याःलिसें निगूगु, न्युजिल्यान्ड स्वंगू कासां प्यंगू ल्याः मुंकाः स्वंगूगु व भारत स्वंगू कासां निगू ल्याःलिसें प्यंगूगु थासय् दु ।

म्हिगः हे जूगु न्हापांगु कासाय् स्कटल्याण्डयात १६ रनं बुकाः न्युजिल्याण्डं नं सेमिफाइनल थ्यनेगु संभावना ल्यंकूगु दु । विश्वकप क्रिकेटय् थौं नं निगू कासा जुइ । थौंया न्हापांगु कासाय् अष्ट्रेलियां बंगलादेशलिसे म्हितीबलय् निगूगु कासाय् श्रीलंकां वेष्ट इंडीजलिसे धेंधें बल्लाः याइ ।

Categorized in कासा