विश्वकप टि– ट्वेन्टी क्रिकेटअन्तर्गत पुचः चरणया लिपांगु कासाय् भारतं नामिबियायात ९गू विकेटं बुकूगु दु ।

युएईया दुबइलय् वंगु चान्हय् जूगु कासाय् नामिबियां ब्यूगु सछि व ३३गू रनया सामान्य लक्ष्ययात भारतं १५गू ओभर २गः बलय् १गू विकेटया क्षतिइ पूवंकूगु खः । भारतं कासा त्याकूबलय् रोहित शर्मां ५६गू रन दयेकूगु खः ।

लोकेस राहुलं अविजित ५४गू रनया योगदान ब्यूगु दु । कासा त्याःसां भारत विश्वकपया पुचः चरणं पिहाँवंगु दु । पुचःया ५गू कासापाखें भारतं ६गू जक ल्या दयेकूगु दु ।

ज्वःलाक्क कासा म्हिताः ८गू ल्या दयेकूगु न्युजिल्याण्ड व १०गू ल्या मुंकूगु पाकिस्तान सेमिफाइनलय् दुहाँवंगु दु । विश्वकप टि–ट्वेन्टी क्रिकेटया सेमिफाइनल कासात कन्हय्निसें न्ह्याइ ।

न्हापांगु सेमिफाइनलया कासाय् कन्हय् जःछिपाः ८ताः ईलय् आबुधाबीइ इंग्ल्याण्डं न्युजिल्याण्डनाप म्हिती । अथेहे बिहिवाः बहनी दुबइलय् जुइगु निगूगु सेमिफाइन कासाय् पाकिस्तान व अष्ट्रेलियादथुइ धेंधेंबल्ला जुइ ।

Categorized in कासा