टी–ट्वान्टी क्रिकेटय् पाकिस्तान त्यात
दिल्लागा अष्टमी ११४१,साउन १७ सोमवाः
घरेलु टोली वेस्ट इन्डिजविरुद्धया निगूगु टी–ट्वान्टी क्रिकेटय् पाकिस्तान त्याःगु दु ।
वंगु चान्हय् जूगु कासाय् पाकिस्तानं वेस्ट इन्डिजयात ७ रनं बुकूगु खः । पाकिस्तानं ब्यूगु सच्छि व ५८ रनया आज्जु ल्यूगु वेस्ट इन्डिजं २० ओभरय् ४ विकेट तंकाः सत्या रन जक दयेकेफत । वया लागिं निकोलस पुरनं अविजित ६२ रन दयेकूसां टिमयात त्याकाबी मफुत ।
पाकिस्तानया शहिन शाह अफ्रिदी, मोहमद हाफिज, हसन अली व मोहमद वासिमं १÷१ विकेट काल । थ्वयां न्ह्यः न्हापां ब्याटिङ याःगु पाकिस्तानं २० ओभरय् ८ विकेट तंकाः सच्छि व ५७ रन दयेकूगु खः ।
पाकिस्तानया लागिं कप्तान बाबर आजमं ५१ रनया अर्धशतकीय इनिङ्स म्हितल । मोहमद रिजवानं ४६ रन दयेकाः दच्छि दुने हे दक्कले अप्वः टी–ट्वान्टी रन दयेकूम्ह कासामिया कीर्तिमान दयेकल ।
रिजवानं सन् २०२१य् ७सः व ५२ रन दयेकूगु दु । थुगु कासा त्याःगुलिसें पाकिस्तानं ४ कासाया सिरिजय् १–० या अग्रता दयेकूगु दु । न्हापांगु कासा वा वःगु हुनिं नतिजा विहीन जूगु खः ।
Categorized in कासा
