टी–२० विश्वकप एसिया क्षेत्र छनोटय् नेपालं थौं लिपांगु कासा म्हितीगु
कछलागा नवमी ११४२, मंसीर १२ आईतवाः
आईसीसी मिसा टी– २० विश्वकप एसिया क्षेत्र छनोटय् नेपालं थौं युएईलिसे लिपांगु अले निर्णायक कासा म्हितेत्यंगु दु ।
नेपाः व युएईदथुइया कासा आईसीसी एकेडेमी नम्बर २ लय् जुइ । थौंया त्याकामि शीर्ष थासय् थ्यनीबलय् वइगु दँ जुइगु टी– २० विश्वकप ग्लोबल छनोटय् थाय् दयेकी । युएई ४गू कासा त्याकाः शीर्ष थासय् दु ।
थुखय् नेपाः युएईयात बुकाः ग्लोबल छनोटय् थःगु थाय् सुरक्षित यायेगु कुतः यानाच्वंगु दु । नेपालं ४गू कासा मध्ये ३गू कासा त्याकूगु दुसा छगू कासा बूगु खः । थ्वनाप नेपाः ६गू ल्या मुंकाः निगूगु थासय् दु ।
नेपालं थौंया कासा त्याकेधुंकाः नेट रनरेटय् न ध्यान बिइमाःगु खनेदु । नेपाःया नेट रनरेट २.०८८ अले युएईया २.३९८ दु । नेपाः न्हापांगु कासाय् हङकङलिसे ६गू विकेटं बुनाः दबाबय् लाःगु खः ।
अनलिं नेपालं सानदार रुपं कासा त्याकाः न्हापांगु चरणया सम्भावना म्वाकूगु खः । भुटानयात ८गू विकेट, कुवेतयात ९गू विकेट अले मलेसियायात ६गू विकेटं बुकूगु खः ।
युएईलं मलेसियायात ३०गू रन, हङकङयात ११गू रन, भुटाननाप ४७गू रन अले कुवेतयात ७गू विकेटं बुकूगु खः । थ्वनाप युएई, न्हापांगु चरणलिक्क थ्यंगु दु ।
