कोरोना सम्बन्धि स्वास्थ्य मापदण्ड पालना मयाःगु कसुरय् अष्ट्रेलियां सर्वियन टेनिस कासामि नोभाक जोकोभिचया अष्ट्रेलियन भिसा रद्द याःगु दु  ।

विश्व नम्बर एक टेनिस कासामि जोकोभिच अष्ट्रेलियन ओपन म्हितेत मेलबर्न थ्यनेधुंका अष्ट्रेलियां भिसा रद्द यानाबिउगु खः ।

अष्ट्रेलियन बोर्डर फोर्सया कथं जोकोभिच व वयेकया टिमं अष्ट्रेलिया प्रवेशया नितिं माःगु स्वास्थ्य मापदण्ड पालना जूगु दसि पेश यायेमफुत ।

मेलबर्न विमानस्थलय् ताः ई तक्क नियन्त्रणय् तयेधुंका जोकोभिचयात आः अष्ट्रेलियन सरकारया स्वामित्वय् दूगु छगू होटलय् तयातःगु दु । उगु होटलय् अष्ट्रेलिया दुहाँवइपिं अवैध आप्रवासीतयेत तयेगृु यानावःगु खः  ।

आः मेलबर्नं सर्विया वनिगु उडानमार्फत जोकोभिचयात लितछ्वयेत्यंगु दु । जोकोभिचं थ्वयान्ह्यः कोरोना विरुद्धया खोप मकाःसा नं थःपिन्त अष्ट्रेलियन ओपन म्हितेत अष्ट्रेलिया सरकारं अनुमति बिउगु खः ।

थ्वहे दथुइ अष्ट्रेलियाया प्रधानमन्त्री स्कट मरिसनं स्वास्थ्य मापदण्ड व सिमा सुरक्षा कानुन सिवें च्वयेय् सुं नं नागरिक मदूगु धका जोकोभिचया भिसा रद्द यायेगु निर्णयया बचाउ यानादीगु दु ।

सर्वियाया राष्ट्रपति अलेक्जेण्डर भुसिकं स्टार कासामि जोकोभिच अष्ट्रेलियाय् अपमान व अभद्र व्यवहारया शिकार जूगु धका कुँख्यनादीगु दु ।

विकसित घटनाक्रमलिपा जोकोभिचं  दँया न्हापांगु ग्राण्डस्लाम टेनिस धेंधेंबल्ला अष्ट्रेलियन ओपन म्हिते मखनिगु जूगु दु  । अष्ट्रेलियन ओपन थ्वहे जनवरी १७ तारिखनिसें मेलबर्नय् जुइत्यंगु दु ।

Categorized in कासा