प्रशान्त महासागरया टापु देय् टोंगाया समुद्री तटय् जूगुु ज्वालामुखी विष्फोट लिपाया क्षति आंकलन यायेत व मानवीय ग्वहालिया नितिं न्युजिल्याण्डं छगः बिमान टोंगा छ्वगु दु ।

न्युजिल्याण्डया प्रधानमन्त्री जसिन्डा आर्डर्नं उगु क्षेत्रय् सुनामीया हुनिं तःगु क्षति याःगु धका स्थिति थुइकेत बिमान छ्वयागु जानकारी बियादील ।

टोंगाया जनताया जीवन रक्षाया नितिं बिश्व समुदायं थःथःगु क्षेत्रपाखें ग्वहालिया कुतः न्ह्याकुगु दु । ज्वालामुखी बिस्फोटया हुनिं प्रशान्त क्षेत्रया टापु खरानीं त्वपूगु दुसा अनया सञ्चार बिच्छेद जूगु लिसें मत आपुर्ती तकं बन्द जूबलय् म्होतिइ ८० द्वःम्ह मनू लिच्वःलय् लाःगु दु ।

उकिया लिच्वः अमेरिका व जापानय् नं लाइगु संभावना अप्वःगु धका उगु देयेतयेसं सतर्कता नालाकाःगु दु । अमेरिका व जापानं थःगु प्रशान्त तटीय क्षेत्रया मनूतयेत सुरक्षित थासय् वनेत अपील याःगु दु  ।

Categorized in अन्तर्राष्ट्रिय