२०८० चैत्र १६, शुक्रबार

टोकियो ओलम्पिकय् नेपाःया न्याम्ह कासामिं ब्वति काइगु

बछलागा सप्तमी ११४१, असार १७ बिहिवाः

जापानय् न्ह्यायेत्यंगु टोकियो ओलम्पिकय् नेपालं न्याम्ह कासामिं ब्वति काइगु जूगु दु ।
 
नेपाल ओलम्पिक कमिटी (एनओसी) या कथं नेपालं टोकियो ओलम्पिकय् म्हितीपिं न्याम्ह कासामि क्वःज्यूगु खः । स्वीमिङया गौरीका सिंह व एलेक्स शाह, एथ्लेटिक्सया गोपिचन्द्र पार्की, सुटिङया कल्पना परियार व जुडोया सोनिया भट्टं न्ह्यःने वयाच्वंगु ओलम्पिकय् नेपालया प्रतिनिधित्व याइ ।
 
सुटिङया कल्पना व जुडोया सोनियां वाइल्र्ड कार्डमार्फत ओलम्पिकय् ब्वति कायेत्यंगु खः । ओलम्पिक तयारीया लागिं आईओसीं सन् २०१९  मे महिनानिसें ७ कासाया १२ कासामितय्त ओलम्पिक छात्रवृत्ति ब्यूगु खः । व हे अन्तर्गत प्रशिक्षण बीत व कासा म्हितेत कासामितय्त लय् ५सः डलर छात्रवृत्ति बियावःगु खः ।
 
नेपाल एथ्लेटिक्स संघं कासामिया नां सिफारिस मयाःगु हुनिं गोपीचन्द्र पार्कींं थुगु छात्रवृत्ति चूलाकेमफुत । वय्कलं थःगु हे खर्चय् ओलम्पिकया तयारी यानाच्वंगु दु । ओलम्पिकय् न्याम्ह कासामिं प्रतिनिधित्व याइगु जुइधुंकाः ल्यं दुपिं कासामितय्सं चूलाकावःगु छात्रवृत्ति द्यूगु दु ।
 
कोरोना महामारीया हुनिं ओलम्पिकं थीथी कासाय् वाइल्ड कार्ड क्वःछ्यूगु खः । सुटिङ व जुडोय् यक्व कोटा क्वःछ्यूगुलिं नेपालं निम्ह कासामिया ब्वति पक्का जूगु दु ।
 
थुगुसी ओलम्पिक जापानया टोकियोय् जुलाई २३ निसें अगष्ट ८ तक्क जुइ । नेपालं सन् १९६४ निसें ओलम्पिकय् ब्वति कायेगु न्ह्याकूगु खः ।
 
Categorized in कासा