स्वनिगःलय् न्ह्याइगु सार्वजनिक सवारी ज्वलंनय् तःगु जोरबिजोर प्रणाली चिइकुगु दु ।

जिल्ला प्रशासन ज्याकु काठमाडौं नं म्हिगः आदेश जारी याना थौं निसें लागू जुइगु याना उगु प्रणाली चिइकेगु निर्णय जूगु न्ह्यथना बिउगु खः । न्हूगु आदेश कथं  बस, माइक्रो व टेम्पोय् जोरबिजोर प्रणाली चिइकुगु दु । तर, ट्याक्सी व निजी सवारी (दुई पांग्रे)लिसेंयालय् धाःसा जोरबिजोर प्रणाली यथावत जुइगु प्रशासनया आदेशय् उल्लेख दु ।

थ्वयान्ह्यः च्वंगु कोभिड–१९ संकट व्यवस्थापन समन्वय केन्द्र (सीसीएमसीसी) या मुँज्यां ट्याक्सी व निजी बाहेकया सार्वजनिक सवारीइ जोरबिजोर प्रणाली चिइकेत सिफारिस यायेगु निर्णय याःगु खः  । जोरबिजोर प्रणालीं सार्वजनिक सवारीइ भिड अप्वयेकुगुलिं संक्रमणया जोखिम झं अप्वःगु धका जनस्तरपाखें सरकारया तच्वकं कुँख्यना जुयावःगु खः  ।

अथेहे, माघ मसान्त तक्क ब्वनेकुथिइ भौतिक उपस्थितिइ पठनपाठन बन्द यायेगु नं प्रशासनया आदेशय् उल्लेख दु । अयेसां प्राविधिक व भाय् परीक्षात धाःसा स्वास्थ्य मापदण्ड पालना याना संचालन याये दइगु उल्लेख दु ।

थ्वयान्ह्यः सरकारं माघ १५ गते तक्क ब्वनेकुथिइ भौतिक उपस्थितिइ पठनपाठन यायेगुलिइ रोक तःगु खः । तर, कोरोनाया जोखिम यथावत् दूगु धका थुगु ई ताहाक याना माघ मसान्ततक्क थ्यंकुगु खः  ।

थुखे, पार्टी प्यालेस, डान्स बार, रेष्टुरेन्ट, जिम व फिल्म हलय् थ्वयान्ह्यःया निर्णय यथावत् तःगु दु ।

Categorized in राष्ट्रिय