ट्रम्पं न तयेगु यात मास्क
लहनान्युज | दिल्लागा सप्तमी ११४०,असार २८ आइतवाः
अमेरिकी राष्ट्रपति डोनाल्ड ट्रम्पं कोरोना भाइरस महामारी सुरु जुइ धुका सार्वजनिक थासय् वयेत न्हापां मास्क तया वःगु दु । म्हिगः शनिवाः वाशिङ्गटन पिने वाल्टर रीड सैन्य अस्पताल वनेत ट्रम्पं मास्क तया वःगु खः ।
जनस्वास्थ्य विज्ञपिन्स कोरोना संक्रमणपाखे बचे जुइत मास्क तयेगु अनिवार्य जूगु धका धाःसा ट्रम्पं थुकियात पालना धाःसा मया । ट्रम्पं थः प्रतिद्वन्द्वी डेमोक्रेटिक नेता जो विडेनयात तक मास्क तया वयाच्वंगुलि मुखौटो तया वयाच्वम्ह धका हिस्यायेगु तक याःगु खः ।
तर म्हिगः शनिवाः ट्रम्पं ह्वाइटहाउसपिने वयेगु झ्वलय् मास्क तयेगु यासा बांलाइ धका धाःगु खः । ट्रम्पं, ‘जि गुवलय् न मास्कया विपक्षय् मखु । जिगु बिचारय् मास्क बांलागु खः, तर थुकिया ई व थाय् दइ धका धाःगु खः ।’
थ्व स्वया न्ह्य ट्रम्पं सार्वजनिक रुपं मेपिन्स खने दयेक, विशेष याना पत्रकारपिन्स खने दयेक तयेगु मयानागु खः धका धाःगु खः । तर शनिवाः ट्रम्पं हाकू मास्कय् पिहा वःगु खः ।
जोन्स हप्किन्स विश्वविद्यालयया कथं अमेरिकाय् ३२ लाख ४५ द्धः स्वया अप्वसित कोरोना संक्रमण पुष्टि जूगु दु सा अन छगू लाख ३४ द्धः स्वया अप्व मनू सी धूकुगु दु ।
विश्वविद्यालयया कथं हलियकं छगू करोड २६ लाख ७९ द्धः स्वया अप्वसित कोरोना संक्रमित पिहा वःगु धका धाःगु दु । कोरोना संक्रमणपाखे ५ लाख ६४ द्धः ३९४ म्ह सी धुकुगु दु ।
