ट्रम्पया आर्थिक सल्लाहकारपाखें राजीनामा
लहनान्युज | ने.सं. ११३८ चिल्लागा षष्ठी (७ फेब्रुअरी २०१८)
अमेरिकी राष्ट्रपति डोनाल्ड ट्रम्पया मुख्य आर्थिक सल्लाहकार गेरी कोनं राजीनामा बियादीगु दु । ५७दँ दुम्ह कोन ट्रम्प प्रशासनय् राजीनामा बियादीम्ह आःतकया हे उच्च ओहोदाया कर्मचारी जूगु नं बिबिसीं न्ह्यथंगु दु ।
स्वतन्त्र ब्यापार नीतिया पक्षधर कोनं राष्ट्रपति ट्रम्पया लिपांगु ब्यापार योजनायात कयाः असन्तुष्टिया हुनिं राजीनामा बियादीगु अमेरिकी सञ्चारमाध्यमं न्ह्यथंगु दु ।
एल्मुनियम व स्टीलया सामानया आयातय् कर अप्वयेकेगु राष्ट्रपति ट्रम्पया योजनाया विपक्षय् दुम्ह कोनं ट्रम्प प्रशासनय् ज्या यायेदुगुलिं थः लय्ताःगु नं न्ह्यथनादीगु दु ।
थ्व हे झ्वलय् राष्ट्रपति ट्रम्पं ट्वीट यासें याकनं हे न्हूम्ह आर्थिक सल्लाहकार नियुक्तत यायेगु धयादीगु दु ।
ट्रम्प प्रशासनया लिपांगु क्वःछिनां अर्थतन्त्रय् तःधंगु ‘धक्का’ लाःगु धासें उकियात कयाः छचाखेरं कुंखिनाहःगु दु ।
Categorized in अन्तर्राष्ट्रिय
