ट्रम्प अमेरीकाया न्हूम्ह राष्ट्रपति
लहनान्यूज सम्वाददाता | कछलाथ्व नवमि ११३७ (नोभम्बर ९ २०१६)
डोनाल्ड ट्रंप चुनावी धेंधें बल्लाखय् थः प्रतिद्वन्दि डेमोक्रेट उम्मेदवार हिलारी क्लिन्टनया ल्यूने लाकाः अमेरीकाया ४५म्हम्ह राष्ट्रपति जुइत ताःलाःगु दु ।
त्यायेधुंकाः थःगु सम्बोधनय् अमेरीकाया न्हूम्ह राष्ट्रपति ट्रम्पं थः सकसिगु राष्ट्रपति जुइगु धासें थःके तसकं बांलाःगु आर्थिक योजना दुगु धाल । अर्थव्यवस्थाया आकार निदुगं दयेकाः हलिंया दक्कले बल्लाःगु इकोनोमि जुइगु ट्रम्पया धापू खः ।
अमेरीकाया पासा जुइ न्ह्याःगु दक्वं देयतलिसे क्वात्तूगु स्वापू दयेकेगु नं ट्रम्पं धाल । लिसें ट्रम्पं हरेक अमेरीकिं थःगु प्रतिभायात पूवंक छ्यलेगु व्हःताः बीगु नं धाःगु खः ।
थः त्याःगुलिइ प्रतिद्वन्दि क्लिन्टनं नं थःत फोन यानाः भिंतुना ब्यूगु जानकारी ट्रम्पं बिल । थम्हं नं क्लिन्टनयात न्ह्यइपूगु व क्वात्तूगु धेंधें बल्लाःया नितिं भिंतुना देछासें सकसितं नापं ब्वनाः न्ह्याःवनेगु धयागु ट्रम्पं कंगु खः ।
Categorized in अन्तर्राष्ट्रिय
