डिआइजि सिलवालयात प्रहरीं ज्वन
लहनान्यूज | चौलागा त्रयोदशी ११३७ (अप्रिल २४ २०१७)
नेपाल प्रहरीया डीआईजी लिसें केन्द्रिय अनुसन्धान ब्युरो प्रमुख नवराज सिलवालयात प्रहरीं ज्वंगु दु ।
कार्यसम्पादन मूल्याङ्कन फाइल हेरफेरबारे प्रहरीं सिलवालयाके न्यनेकने यानाच्वंगु दु । सिलवालं कार्यसम्पादन मूल्यांकनया भ्वं न्ह्यब्वयेगु झ्वलय् कीर्ते याःगु बारे छानविन यानाच्वंगु खः ।
सिलवालं तत्कालिन डीआइजी प्रकाश अर्यालया कार्यसम्पादन मूल्याङ्कनया भ्वं किर्ते यानाः उकी थःगु नां तयाः अदालतय् न्ह्यब्वःगु खनेदुगु धासें सरकारं सरकारी भ्वं कितेया मुद्दाय् कारवाही यायेगु तयारी याःगु दु ।
उचित लिसः मवःतल्ले सिलवालयात निगरानिइ हे तइगु न्ह्यथंगु दु ।
बालुवाटारय् वरिष्ठ अधिवक्ता शम्भु थापाया छेँय् कानुनी परामर्श कयाच्वंगु इलय् सिलवालयात प्रहरीं ज्वनायंकूगु खः । प्रहरीं सिलवाललिसें अधिवक्ता थापायात नं ज्वनायंकूगु दु ।
आईजीपीं सःतूगु मुँज्या बहिष्कार यायेधुंकाः प्रहरी हेडक्वाटरं सिलवालयाके स्पष्टीकरण फ्वंगु खः । छानविन समितिं बयानया नितिं सःतूबलय् नं सिलवाल मवंगु खः ।
Categorized in अपराध
