तःजिक क्वचाल संकिपा नखः
लहनान्यूज | कछलाथ्व अष्टमि ११३७ (अक्टोबर २८ २०१७)
नेपाली संकिपा ख्यःया आमा धकाः म्हस्यूम्ह, नेपाःया न्हापांगु संकिपा ‘आमा’य् आमाया भूमिका म्हितूम्ह कलाकार चैत्यदेवी सिंहयात नेवाः फिल्म सोसाईटिं तःजिक हंगु दु ।
नेवाः फिल्म सोसाईटीं येँय् ग्वसाः ग्वःगु निन्हुयंकंया संकिपा नखः ज्याझ्वः ‘निक्वःगु ल्ँक् संकिपा नखः’या समापन समारोहस कलाकार सिंहया लिसें वरिष्ठ कलाकर्मी ख्यालिजुजु मदनकृष्ण श्रेष्ठया ल्ँक् संकिपा सम्मान ११३७ पाखें हंगु खः ।
संगीत, नाट्य, संकिपाया माध्यमं मदिक्क नेपालभाषा साहित्य, कला ख्यःया लिसें मुक्कं नेपाःया हे कला ख्यलय् ब्यूगु योगदानयात च्वछासें ख्यालि जुजु श्रेष्ठयात हंगु खः ।
आमा संकिपाया मू पात्र आमाया भूमिका म्हितेगुया लिसें नेपाःया न्हापांगु रंगीन संकिपाया नापं नेपाःया न्हापांगु आदिवासी जनजाति सम्वद्ध विषयस दयेकूगु संकिपा कुमारीया मुख्य नकिं कथं म्हितादीम्ह व लोक सेवा आयोगया जाँच पास यानाः सहायक निर्देशकया नियुक्ति चूलानाः नेपाःया न्हापांम्ह मिसा निर्देशक जुइत ताःलाःम्ह कलाकारया रुपं कलाकार चैत्यदेवी सिंहयात हंगु खः ।
सम्मानित व्यक्तित्वद्वययात खादां न्ययेकाः, हनापौ व करुणामयया रथया ढाँचाय् दयेकातःगु हनाचिं लिसें हंगु खः । वरिष्ठ गायक प्रेमध्वज प्रधान व जनगायक भृगुराम श्रेष्ठं सम्मानितद्वययात हनापौ व हनाचिं लःल्हानादिल ।
‘जितः कलाकार दयेकूगु नेवाः ख्यलं हे खः’
नुगःखँ तयेगु झ्वलय् सम्मानित वरिष्ठ कलाकार मदनकृष्ण श्रेष्ठं थःत थौं मदनकृष्ण दयेकूगु हे नेवाः ख्यलं हे खः धयादिल । मुनासःया ज्याझ्वलय् थःगु ख्यालि न्ह्यब्वया लिसें म्ये न्ह्यब्वया वँवं हे थः थौं मदनकृष्ण जूवःगु वयकःया धापू खः।
मेम्ह सम्मानित वरिष्ठ कलाकार चैत्यदेवी सिंहं संकिपा ख्यलय् थःगु इतिहासयात लुमंकाः ब्यूगु थुगु हनां थम्हं गौरवान्वित महसूस यानागु धयादिल ।
आदिवासी जनजाति चलचित्र महासंघया नायः अमृत सुनुवारं राज्यया संकिपा सम्बन्धि नीति आदिवासी जनजाति मैत्री मजूबलय् जनजाति संकिपाकःमिपिन्सं समस्या फयेमालाच्वंगु धयादिल । आदिवासी जनजाति चलचित्र सेन्सर बोर्ड गठनया लागीं थःपिन्सं राज्ययात सः तया वयाच्वनागु नायः सुनुवारया धापू खः ।
सोसाईटीया नायः लुःजः सिंहं नेवाः संकिपाकःमिपिन्सं थःगु संकिपाय् नेवाः पहः क्यनेमाःगु खँय् बः बियादिल । आधुनिक समाज क्यंसां उकी दुने नं ज्यूथाय् छिंथाय् तक्क नेवाः तजिलजि, नेवाः परम्परा क्यनेमाःगु खँय् वयकःया बः खः।
आः नेवाः फिल्म सोसाईटीपाखें नेवाः कलाकारपिनिगु डाइरेक्टरी पिथनेगु योजना नं नायः सिंहं उगु हे ज्याझ्वलय् सार्वजनिक यानादिल ।
‘तापलय्’ पब्लिक च्वाइस जुइत ताःलात
कछलाथ्व सप्तमि शुक्रबाः व अष्टमि शनिबाः यानाः निन्हुयंकं नेपाल पर्यटन बोर्डय् जूगु संकिपा नखलय् ताःहाकःगु, चीहाकःगु यानाः मुक्कं ८ संकिपा क्यंगु खः ।
क्यान्सर ल्वय्या हुनिं मदुम्ह कलाकार रामशेखर नकःमियात श्रद्धान्जलि कथं वयकलं हे निर्देशन यानादीगु ‘पःखाः’ धाःसा विशेष प्रदर्शनीया रुपं क्यंगु खः ।
मेगु ७ संकिपा मध्ये दर्शकया भोटया लिधंसाय् नेपाल सांस्कृतिक उत्थान परिषदया व्यानरय् दयेकातःगु संकिपा ‘तापलय्’यात पब्लिक च्वाइस अवार्ड ब्यूगु खः ।
नेवाः फिल्म सोसाईटीं थ्वयां न्ह्यः थगुने तिनि सुनसरीया धरानय् न्हापांगु संकिपा नखःया ग्वसाः ग्वःगु खः । थगुने उत्सवया रुपय् ग्वसाः ग्वःगु संकिपा नखः थुगुसी धाःसा महोत्सवया रुपं येँय् याःगु खः ।
