ताम्रकार समाजपाखें जेष्ठ नागरीक सम्मान
नृपेन्द्रलाल श्रेष्ठ | चिल्लागा पंचमी ११३९ (मार्च २५ २०१९)
ताम्रकार समाजया ज्येष्ठ नागरिक उपसमितिं वंगु न्यादँ न्ह्यःनिसें ज्येष्ठ नागरिकपिन्त नापलाय्ग्ु ज्याझ्वःयात निरन्तरता बिया वयाच्वंगु दु । थुगुसी धाःसा न्हापांखुसी जंक्व क्वचायेधुंकूपिं थ्यंमथ्यं ग्वीम्ह ज्येष्ठ नागरिकपिन्त छेँय् छेँय् वनाः सम्मान याय्गु ज्या जूगु खः ।
उगु ज्याय् स्वास्थ्य उपसमिति, युवा तथा खेलकूद उपसमिति, धार्मिक क्रियाकलाप उपसमितिं ग्वाहालि याःगु ताम्रकार समाजया नायः रविन्द्र ताम्रकारं जानकारी बियादिल ।
नायः ताम्रकारं समाजय् जुया वयाच्वंगु थीथी ज्याझ्वः मध्ये नं थुगु ज्यापाखें अप्वः आत्मसन्तुष्टि दुगु खँ धयादिसें ज्येष्ठ नागरिकपिनिगु आशिर्वाद व मार्ग निर्देशनपाखें समाजं अझ प्रगति
याय्फइगु नं धयादिल ।
ज्येष्ठ नागरिकपिनिगु छेँय् छेँय् वनेगु नितिं खुगू पुचः दय्कूगु खः । थ्व हे झ्वलय् ज्येष्ठ नागरिक उपसमितिया संयोजक विजय ताम्रकारं समाजपाखें थुगु ज्या बाहेक दँमुँज्याय् नं ज्या जंक्व क्वचाय्धुंकूपिं ज्येष्ठ नागरिकपिन्त हना वयाच्वनागु धयादिल । नापं थुगु ज्याझ्वःया नितिं समाजपाखें दातापिन्सं ग्वाहालि याःगु खः ।
