ताम्रकार समाजया झिंन्हय् क्वःगु दँमुँज्या
लहनान्युज | चौलाथ्व एकादशी ११३९ (अप्रिल १५ २०१९ं)
ताम्रकार समाजया झिंन्हय् क्वःगु दँमुँज्या नापं नी स्वक्वःगु मंकाः मुँज्या जुगु दु । उगु मुँज्याय् नेवाःत थःगु परम्परा, रीति थिति, नखः चखः, लजगाः आदि विविधताया हुनिं सम्पत्र खने दुसां आर्थिक स्तर, चेतनास्तर अभिबृद्धि याय्गु खँय् धाःसा ल्यूने हे लाना च्वंगु खँन्ह्य थंगु दु ।
जाह्वला ख्यःया ताम्रकार समाजया भवनय् जूगु उगु ज्याझ्वलय् मूपाहाँलिसें नेवाःतय्गु राष्ट्रिय संगठन नेवाः देय् दबूया नायः नरेश ताम्रकारं नेवाःत थःगु पहिचान, मौलिकता व स्वाभिमानया विषयस छधी छप्पँ जुयाःन्ह्याः वनेगुया विकल्प मदुगु धयादिल ।
ज्याझ्वलय् ताम्रकार समाजया नायः रविन्द्रराज ताम्रकारं नेवाःतय्गु मौलिक संस्कृति, रहनसहन, तजिलजि, भाषाय् जुयाच्वंगु अतिक्रमण चिन्ताजनक जूगु धयादिसें थुकियात कयाः मेपिन्त द्वपं जक बीगु ज्या जुयाच्वंगु धयादिल ।
ज्याझ्वलय् ज्याःजंक्वयाय् धुंकूपिं नीछम्ह ज्येष्ठ नागरिकपिन्त हंगु खःसा वंगु शैक्षिक सत्रय् समाजया एसइइ परीक्षानिसें पिएचडी तक अध्ययन क्वचाःपिं ग्वीम्हेसित हनेगु ज्या जूगु खः । अथे हे समाजयात आर्थिक व भौतिक ग्वाहालियाना दीपिन्त मूपाहां ताम्रकारं हनादीगु खः ।
थ्व हे झ्वलय् दँय् दसं समाजं बियावया च्वंगु ‘उग्रचण्डी सम्मान सिरपाः’थुगुसी शारीरिक सुगठनया सागर ताम्रकारयात झिद्वः तका दां लिसें हनापौ लःल्हाःगु खः । ज्याझ्वलय् समाजया न्वकू विनोद ताम्रकार, सम्मानित ब्यक्तित्व सागर ताम्रकारं न्ववानादीगु खः ।
उगु हे दिनस जूगु बन्द सत्रय् मूछ्याञ्जे शम्भुगोविन्द ताम्रकारं वार्षिक प्रतिवेदन व दांभरि दीपेश ताम्रकारं आर्थिक प्रतिवेदन न्ह्यब्वयादीगु खः ।
