तालिवानं गर्भवती मिसा स्याःगु द्वपं लात
गुंलागा त्रयोदशी ११४१, भाद्र २१ सोमबाः
अफगानिस्तानय् सत्ता कःघानाच्वंगु तालीवानी बिद्रोहीयात छम्ह मिसा प्रहरी स्याःगु द्वपं लाःगु दु ।
च्यालाया गर्भवती उम्ह मिसा सुरक्षाकःमिया छेँय् हे दुहांवनाः बन्दुकधारी पुचलं वय्कःया भाःत व काय्म्ह्याय्या न्ह्यःने हे स्यानाब्यूगु खः । उम्ह मिसाया पारिवारिक श्रोत व प्रत्यक्षदर्शीतय्सं धाःसा तालीवानं हे हत्या याःगु दाबी याःगु दु ।
गोलिं कयेकाः स्यानाब्यूम्ह उम्ह मिसाया म्ह व ख्वाः तकं क्षतबिक्षत यानाब्यूगु धाःगु दु । स्थानीय कारागारय् ज्या यानाच्वंम्ह उम्ह मिसा सुरक्षाकःमियात छाय् स्यात धइगु सीमदुनि ।
अफगानिस्तानय् लिपांगु इलय् अधिकार माग यासें मिसातय्सं याःगु प्रदर्शनय् वय्कलं ब्वति काःगु आशंकाय् स्यानाब्यूगु जुइफुगु धाःगु दु । उम्ह मिसाया सीम्हया भिडियो सामाजिक सञ्जालय् भाइरल जूगु दु ।
तालीवानं धाःसा घटनाबारे अनुसन्धान यायेगु धाःगु दु । थ्व हे दथुइ, तालीवानं मिसा अधिकारया समर्थनय् जूगु प्रदर्शनय् ब्वति काःपिन्त मालाः मालाः हे कारबाही यायेगु न्ह्याकूगु दु ।
Categorized in अन्तर्राष्ट्रिय
