२०७८ माघ ५, बुधबार

तालिवानया ज्यादती अप्वःल

ञंलागा औंसी ११४१, असोज २० बुधवाः

अफगानिस्तानया जातिय अल्पसंख्यक अले शिया मुसलिम तालिवानया निशानाय् लानाच्वंगु सीदुगु दु ।
 
तालिवान विद्रोहीं वंगु अगष्टय् हजारा समुदायया १३म्हेसित स्याःगु खँ सार्वजनिक जूगु दु । अफगानिस्तानया दयकुंडी प्रान्तय् उमिगु सामुहिक हत्या याःगु दावी मानवअधिकारवादी संस्था एम्नेष्टी इन्टरनेशनलं याःगु दु ।
 
सीपिंलय् १७ दँया छम्ह मिसामचालिसें ९ पुर्व सैनिकत दु । तालीवानया न्ह्यःने वंगु अगष्टय् आत्मसमर्पण याःपिं सैनिकतय्त स्यानाब्यूगु खःसा निम्ह सर्वसाधारण नागरिक नं सीगु दु ।
 
उमित थः छेँजःया दुजःया न्ह्यःने हे गोलीं कयेकाः स्यानाब्यूगु खः । हजारा समुदाय अफगानिस्तानया स्वंगूगु तःधंगु जातीय समुदाय खः । उपिं शिया इस्लाम धर्मया अनुयायी जूगु सीदुगु दु ।
 
अफ्गानिस्तानय् तालिवान विद्रोहीं सत्ता कब्जा यायेधुंकाः ५० स्वयां अप्वःसिया गैरन्यायिक हत्या याःगु धाःगु दु ।
Categorized in अन्तर्राष्ट्रिय