तेबहाःया मूगःद्यः पुनर्निर्माण क्वचाल
लहनान्युज | गुंलाथ्व १४ ११३९ (अगष्ट १३ २०१९)
कामपा २२ वडास्थित तेबहाः (राजकीर्ति महाविहार) दुने च्वंगु अक्षोभ्य तथागत (मूगःद्यः) या देगः पुनर्निर्माण सिधःगु लसताय् म्हिगः प्रसाद ग्रहण लिसें पुनर्निर्माण ज्याय् ग्वाहालि याःपिंत हनेगु ज्या जुल ।
ज्याझ्वलय् येँ महानगरपालिकाया मेयर विद्यासुन्दर शाक्यं तेबहाः दुने आः आगंछेँ व पाःलाःद्यःया देगः नं पुनर्निर्माण याना छ्वयेगु ग्वसाः दुगुलिं याकनं हे थ्व ज्या नं न्ह्याका छ्वयेत इनाप यानादिल ।
वय्कलं तेबहाः दुने च्वंगु थीथी सम्पदाया पुनर्निर्माण सिधयेधुंकाः पुनर्निर्माण यायेमाःपिं मेमेगु बहाःबहीयापिंत नं पुनर्निर्माण वा जीर्णोद्धारया बारे जानकारी बियाः ग्वाहालि यायेत नं
इनाप यानादिल । लिसें वय्कलं पुनर्निर्माण लिपा सम्पदास्थल जःखः हरियाली कायम यायेत नं इनाप यानादिल ।
श्री संकटा संरक्षण तथा व्यवस्थापन समितिया ग्वसाः व महाविहारया चक्रेश्वर मोतिकाजी वज्राचार्यया सभापतित्वय् जूगु उगु ज्याझ्वलय् समितिया छ्यांज्ये माणिकरत्न स्थापितं देगः पुनर्निर्माणया ज्याय् ६७ लाख चाःचू खर्च जूगु व उकी येँ मनपा लिसें सांसद कोषपाखें ४५ प्रतिशत व सर्वसाधारणपाखें ५५ प्रतिशत ग्वाहालि याःगु जानकारी बियादिल ।
कामपा शहरी योजना आयोगया उपाध्यक्ष सरोज बस्नेतं नं न्ववानादीगु उगु ज्याझ्वलय् प्रतिनिधिसभाया सांसद कृष्णगोपाल श्रेष्ठ, प्रदेश सभाया सांसद डा. अजयक्रान्ति शाक्य व राजेश शाक्यया नं उपस्थिति दुगु खः ।
