तोखा नगरपालिकाय् लकडाउनया अवस्था
नृपेन्द्रलाल श्रेष्ठ | चौलाथ्व दशमी ११४०
तोखा नगरपालिकाया उप मेयर ज्ञानमाया डंगोलं तोखा नगरपालिकाय् कोरोना संक्रमण नियन्त्रण व रोकथामया नितिं नगरपालिका सक्रिय दुगु धयादीगु दु ।
आःया नितिं संक्रमण न्यंकेमबीत सकलें पिहां मवःसे छेँय् हे च्वनेगु दक्कले बांलाःगु ज्या जूगुलिं लकडाउनयात पालना याकेगुपाखे विशेष ध्यान बियाच्वनागु उप मेय डंगोलं धयादिल ।
कोरोना भाइरस कोभिड १९ या खँय् सचेतना कार्यक्रम यायेधुनागु खँ तसें डंगोलं क्लोरिन वासः छ्वाकेगु ज्या नं जुयाच्वंगु जानकारी बियादिल ।
विदेशं वःपिनिगु धलः मुंकाः छेँ दुपिन्त होम क्वारेन्टाइनय् च्वनेत धयागु व छकू कोथाय् बालं च्वनाच्वंपिं न्याम्हेसित नगरपालिकापाखें हे क्वारेन्टाइनय् तयातइगु नं वयकलं धयादिल ।
‘विशेष अवस्थायात ध्यानय् तयाः नगरपालिकापाखें हे स्वथाय् क्वारेन्टाइनया व्यवस्था यानागु दु । छथाय् २५ सीट दुसा मेथाय् १० अले मेगु छथाय् ३ सीटया क्वारेन्टाइनया व्यवस्था यानागु दु’ डंगोलया धापू खः ।
लकडाउनया पूर्ण पालना याकेगु नितिं स्वयम्सेवकपिं खटे यानाः व्यवस्थापन यानाच्वनागु धासें छम्ह निम्ह पिहांवयाच्वनीगु बाहेक तोखाय् लकडाउनयात सकसिनं धइथें पालना यानाच्वंगु दुगु डंगोलं धयादिल ।
न्हि खानाः न्हि नयेमाःपिं विपन्न वर्गयापिनिगु तथ्याङ्क मुंकाच्वनागु व उगु तथ्याङ्क तयार जुयाकथं राहत प्याकेज घोषणा यायेगु नं वयकलं जानकारी बियादिल ।
खाद्यान्न लगायतया अत्यावश्यक ज्वलनय् नगरवासीतयत समस्या मजुइमा धकाः सुथय् निघौ व बहनी निघौ पसः चायेकेबीगु व्यवस्थाया लिसें कालो बजारी मजुइमा धइगु ल्याखं प्रत्येक वडापाखें जन प्रतिनिधिपिन्सं अनुगमन यानाच्वंगु दुगु नं वयकःया धापू खः ।
Categorized in राष्ट्रिय
