त्रिपोलीइ जूगु आक्रमणय् ४०म्ह सित
लहनान्युज | ने.सं. ११३९ दिल्लाथ्व पारु (३ जुलाइ, २०१९), बुधवाः
लिवियाया ट्रिपोली लिक्क छगू आप्रवासी बन्दीगृहस जूगु हवाई आक्रमणय् लानाः ४०म्ह मनूत सीगु दुसा ८०म्ह स्वयां अप्वः मनूत घाःपाः जूगु दु । सीपिं अप्वः धइथें अफ्रिकी आप्रवासी खः ।
लिबियाया तटीय क्षेत्र जुयाः यूरोप दुहां वनीपिं अवैध आप्रवासीपिन्त नियन्त्रणय् कयाः बन्दीगृहस तयातःगु खः । उगु हे थासय् आक्रमण जूगु खः ।
राष्ट्रसंघीय सहयोगय् परिचालित सरकारया प्रधानमन्त्री फयज अल सिरां उगु आक्रमणय् स्थानीय स्वघोषित हिंसात्मक पुचः लिबियाली राष्ट्रिय सेनाया संलग्नता दुगु धयादीगु दु ।
थ्व स्वयां न्ह्यः वंगु सोमवाः उगु पुचलं हवाई आक्रमणया तयारी यानाच्वंगु धाःगु खः । अथे खःसां थुगु आक्रमणय् थःपिनिगु संलग्नता मदुगु उगु पुचःया प्रवक्ताया दावी दु ।
अवैध आप्रवासी नियन्त्रणय् तयेत सरकारं दयेकातःगु थजाःगु बन्दीगेहया दयनीय अवस्थायात कयाः मानवाधिकारवादी संस्थापाखें कुंखिना वयाच्वंगु खः । थजाःगु बन्दीगृह विशेष यानाः तनावग्रस्त थासय् लिक्क तयातःगु दु ।
Categorized in अन्तर्राष्ट्रिय
