थःगु पेशा हे त्याग यायेमाःसा तयार -प्रतिनिधिसभा उम्मेदवार रत्न महर्जन
ने. सं. ११३८ थिंलाथ्व दशमि (नोभेम्वर २८, २०१७) यल
यलया क्षेत्र नं २य् प्रतिनिधिसभा व प्रदेशसभाया निर्वाचन प्रचारय् तीव्रता वःगु दु । थुुगु क्षेत्रया नयाँ शक्ति नेपाल पार्टीपाखें प्रदेश ३ या क्षेत्र नं २ प्रतिनिधिसभा उम्मेदवार रत्न महर्जनजुनापं संवाददाता राजेश बज्राचार्यंया  खँल्हाबल्हा संक्षेपय् न्ह्यब्वया ः
 
रत्न महर्जन
नयाँ शक्ति नेपाल, प्रतिनिधिसभा उम्मेदवार क्षेत्र नं २, यल
 
 
प्रतिनिधिसभा निर्वाचनय् छिगु उम्मेदवारी छाय आवश्यक जुल?,
 
रत्न महर्जनः  आर्थिक समृद्धि, स्थानीय समस्याया समाधान व युवापुस्ताया नेतृत्व विकासया लागि जिगु उम्मेदवारी खः । देयया राजनीतिईं माग याःगु इलय् थःगु पेशा हे त्याग यायेमाःसा तयार जुयागु खः जि । झीसं राजनीतिक व्यवस्था हिलेत यक्वः हे आन्दोलनय् योगदान बिया अयेनं आर्थिक समृद्धि खंके मफुत । झीगु इलय् हे आर्थिक समृद्धि सम्भव दु धैगु जनतादथुइ स्थापित यायेत नयाँ शक्ति पार्टी मार्फत उम्मेदवारी बियागु खः। थुकियानितिं जिगु क्षेत्रया कला, संस्कृतियात पर्यटकीय उद्योग प्रर्वद्धननाप स्वाकेगु सम्भावना दु । थनया हस्तकला, मूर्तिकला लगायत पेशायात आधुनिक प्रविधिनापं विकसित याना ललितपुरयात हस्तकला व सांस्कृतिक नापं पर्यटकीय नगरी घोषणा यायेगु ।  अथेहे, डा. बाबुराम भटट्राई प्रधानमन्त्री व अर्थमन्त्री जुयादिबले न्ह्यथंगु युवास्वरोजार योजनायात निरन्तरता बिइगु ज्यापाखें राष्ट्रिय उद्योग प्रवद्र्धन, युवावर्गया उद्यमशीलता विकासपाखें आर्थिक सम्भावनायात मूर्त रुप बिइगु जिगु एजेण्डा दु । 
 
थौकन्हय् चुनाव प्रचारयानितिं घरदैलो अभियानय् छि व्यस्त धयादिल । थथे छेँ छेँ, त्वाः त्वालय् झायादीबलय् स्थानीयपिनिगु धापु छु दु? 
 
रत्न महर्जनः थौतकं छेँछेँ वनेगु जिमिगु अभियानपाखें क्षेत्र नं २ या मुख्य समस्या धैगु झीगु भाषा, संस्कृति, सम्पदाहरु अतिक्रमणय् लानाच्वन धैगु चिन्तां तसकं हाःकया च्वंगु खनेदु । थनया हस्तकला, मूर्तिकला, प्रस्तर कला, सिज लगायतया थलबल दयेकेगु परम्परागत पेशा संकटय् लायेधुंकल, थुज्वगु व्यवसायया प्रवद्र्धन सुना यायेगु कुतः मयात धैगु व्यवसायपिनिगु चिन्ता खनेदु । युवात स्थानीय लजगाया भविष्य खनेमदु, उचित अवसर मदुगु हुनिं विदेशपाखे अध्ययन व श्रम यायेगु नामं पलायन जुयाच्वंगु समस्या ला देय्न्यंक हे तधंगु समस्या जुयाच्वंगु प्रष्ट जू । मेगु समस्याकथं नेवाःतयेगु राजनीतिक पहुँच, चेतनाया अभाव नं मगागु तायेका । थुपिं समस्यायात ज्यंकेगुनितिं जि चुनावय् न्ह्यज्यानागु नं खः ।
 
न्ह्याबलें वहे पुलाँगु पार्टी व उम्मेदवारपिनित भोट बिया लिच्वः मवःगु खना निराश जनता थुगुसीइ रणनैतिक योजना व प्रतिवद्धता दुपिं उम्मेदवार जक मखु राजनितीइ अनुभव दुगु न्हूगु पार्टीया अपेक्षा यानाच्वंगु प्रष्ट खनेदु । थुपिं समस्यायात ज्यंकेगुनितिं भौगोलिक व सामाजिक परिवेश अनुरुपया विकास रणनिती नयाँ शक्ति पार्टीयाके दु । 
 
थुगु निर्वाचनपाखें विजयी जुयादिल धाःसा छिगु प्रमुख प्राथमिकता छुकिइ जुइ?
 
रत्न महर्जनः  राष्ट्रिय महत्वया नेवाः व तामांग जातिया पहिचान दैगु प्रादेशिक नाँ छुनेगुपाखे पलाः न्ह्याकेगु जुइ । क्षेत्रगत रुपं झीगु भाषा, संस्कृतियात उद्योग व्यवसाय व पर्यटन विकासया पूर्वाधार दयेकेगुपाखे केन्द्रित जुइगु जुइ । थुपिं सकता ज्याया नितिं पार्टीया आधारय् कमजोर उम्मेदवारपिं जक निरन्तरता दइगु परिस्थितियात हिलेत भिजन दुपिं शिक्षित व युवापुस्ताया राजनीतिइ सकारात्मक हस्तक्षेप वातावरण दयेकेगु ज्यापाखें नेतृत्व स्थापित याकेगुपाखे जिगु पला न्ह्याई ।