थः नागरिकयात जूगु दमन दिकेत सैन्य सरकारयात राष्ट्रसंघया ख्याच्वः
बछलाथ्व, नवमी ११४१, असार ५ शनिबाः
संयुक्त राष्ट्रसंघं थःगु देशय् ल्वाभःया अपुक उपलब्धता पनेत म्यानमारयात इनाप याःगु दु ।
राष्ट्रसंघया महासभां वंगु नोभेम्बरय् जूगु आम निर्वाचनया लिच्वः स्वीकार याना जननिर्वाचित नेतातयेत त्वःतेत नं इनाप याःगु खः । सेनां वंगु फेब्रुअरी १ य् जननिर्वाचित सरकार विघटन याना सत्ता ल्हातय् काःगु नापं विपक्षी दलया नेतृ आंङ साङ सूची लिसेंया थी थी नेतायात हिरासतय् काःगु दु ।
राष्ट्रसंघं थी थी ११गू देय्या समर्थनय् म्यानमार सेनाया तानाशाही शासन अन्त्य याना जननिर्वाचित सरकारयात सत्ता लःल्हायेत विशेष प्रस्ताव पारित याःगु बीबीसीं न्ह्यथंगु दु । सेनां जननिर्वाचित सरकार विघटन याना सत्ता नियन्त्रणय् काःगु ताः ई निसें म्यानमारय् सेनाया पलाःया विरोध जुयाच्वंगु दु । द्वलंद्वःम्हसिया ल्याःय् म्यानमारया नागरिकं सडक आन्दोलन याःगु दु ।
शान्तिपूर्ण आन्दोलनयात सैन्य सरकारं दमन याःगु नापं जूगु हिंसाय् थ्यंमथ्यं ९सःम्ह सीगु दु । अथेहे आन्दोलनया झ्वलय् द्वलंद्वः घाःपाः तकं जूगु दु । म्यानमारय् सेनां सत्ता लितमकाःसा तःधंगु गृहयुद्धया जोखिम दूगु धासें दुजः देय्तयेसं राष्ट्रसंघं विशेष पलाः न्ह्याकेमाःगुलिइ बः बिउगु दु ।
राष्ट्रसंघ व युरोपियन युनियनया म्यानमारस्थित आवासिय प्रतिनिधितयेसं सेनाया दमनया हुनिं नागरिकया स्वतन्त्रता हनन् जूगु नापं अल्पसंख्यक रोहिङ्ग्या लिसेंया समुदाय निगुलिं पक्षया दमनय् लाःगु उल्लेख याःगु दु ।
अथेहे राष्ट्रसंघं थःगु नागरिकविरुद्ध हिंसा न्यंकुगु धासें म्यानमारया ध्यान सालेत विशेष प्रस्ताव पारित जूगु न्ह्यथंगु दु ।
Categorized in अन्तर्राष्ट्रिय
