२०८१ जेठ ९, बुधबार

थः हे मतिनामि स्याःम्हेसित ज्वन

लहनान्यूज सम्वाददाता | कछलाथ्व नवमि ११३७ (नोभम्बर ९ २०१६)

थः हे मतिनामियात स्यानाब्यूम्ह रेशम लामिछाने धाइम्ह मुक्तिनाथ लामिछानेयात प्रहरीं ज्वंगु दु ।
 
सिन्धुपाल्चोक जिल्लायाम्ह थौंकन्हय् भुइजःसिइ च्वनाच्वंम्ह २३दँयाम्ह सन्तोषी धाइम्ह एलिसा नेपालीयात स्यानाब्यूम्ह वया हे मतिनामि रामेछापयाम्ह थौंकन्हय् बोडेय् च्वनाच्वंम्ह १९दँयाम्ह लामिछानेयात महानगरीया अपराध महाशाखां खटेजूगु टोलिं ज्वंगु खः ।
 
वंगु कार्तिक १५ गतेनिसें तनाच्वंम्ह एलिसायात मालेगु झ्वलय् २० गते मध्यपुर थिमि नगरपालिका २ मनोहरा खुसिपाखे बोडे वनेगु कच्ची लँय् बोराय् तयाः वांछ्वयातःगु अवस्थाय् वयागु सीम्ह लूगु खः । घटनाया अनुसन्धानया झ्वलय् एलिसाया हे मतिनामि रेशमं वयात स्यानाब्यूगु सीदुगु खः ।
 
इपिं निम्हेसिया दथुइ २०७३ बैसाख महिनाय् भुइजःसिया रिफ बाटर प्रोसेस नांया लः फ्याक्ट्रिइ ज्या यायेगु झ्वलय् निम्ह नापलानाः यःत्यः जूगु खः । लिपा लामिछानेया चालचलन बांमलाः धकाः ज्यां  लिकया बी धुंकाः एलिसाया श्याम श्रेष्ठ नांम्ह मनूलिसे यःत्यः जूवंगु खः ।
 
कार्तिक १२ गतेया दिनय् लामिछानें एलिसायात चाबहिलिइ सःताः बोडेय् थःगु छेँय् ब्वनायंकूगु खःसा छेँय् थ्यंकाः निम्हेसिया दथुइ श्याम श्रेष्ठया खँयात कयाः विवाद जूगु खः । व हे विवादया झ्वलय् लामिछानें एलिसायात सिं दायाः स्यानाब्यूगु खः ।
 
सिं दायेफक्व दायाः स्यानाबीधुंकाः एलिसाया वसःलिसें ब्याग व हि क्यूगु गलैंचा तकं बोराय् तयाः २ किलोमिटर तापाक नीलबाराहि जंगलय् वांछ्वयाब्यूगु खः । व हे बहनी १०ताः ईपाखे एलिसाया सीम्हयात खाया दाना तयेगु प्लाष्टिकया बोराय् तयाः पश्चिमपाखे सडकय् वांछ्वयाथकूगु खः ।
 
लिपा शंका मजुइकेत एलिसायात मालेगु व प्रहरीइ तंगु रिपोर्ट तयेत तकं लामिछाने थः हे जुयाच्वंगु खः । अनुसन्धान यानावनेगु झ्वलय् न्यनेकने यानास्वयाबलय् लामिछानें हे एलिसायात स्याःगु सीदुगु महाशाखां न्ह्यथंगु खः ।
Categorized in अपराध