थप ५९३म्ह कोरोना संक्रमण पुष्टि
लहनान्युज | दिल्लाथ्व पंचमी ११४०,असार १२ शुक्रवाः
वःगु २४ घण्टाया दुने थप ५९३म्हेसित कोरोना भाइरस (कोभिड–१९) या संक्रमण पुष्टि जूगु दु । अथेहे छम्ह मनू कोरोना भाइरसं सीगु दु ।
स्वास्थ्य तथा जनसंख्या मन्त्रालयया कथं दाङय् छम्ह कोरोना संक्रमणं सीगु दु । प्रहरीं अचेत अवस्थाय् नापलाम्ह राप्ती स्वास्थ्य विज्ञान प्रतिष्ठानय् थ्यकुम्ह बिरामीयात चिकित्सक सीगु घोषणा याःगु दु ।
उम्ह मनूयात कोरोना परीक्षण याःगु इलय् शुक्रवाः पोजेटिभ रिपोर्ट वःगु धका मन्त्रालयं धाःगु खः । उम्ह मनूयाःगु पहिचान याये ल्यः दनिगु व परिवार नाप सम्पर्क स्थापित यायेगु कुतः जूया च्वंगु दु धका मन्त्रालयया प्रवक्ता डा. जागेश्वर गौतमं जानकारी बिःगु दु ।
थ्व नाप नेपालय् कोरोना भाइरसया संक्रमणपाखे सीपिनिगु ल्याः २७म्ह थ्यःगु दु ।
मन्त्रालयं बिःगु जानकारी कथं दकलय् अप्व पाल्पाय् ७६म्हेसित कोरोना संक्रमण पुष्टि जूगु दु । अथेहे, दाङय् ७५म्ह, रौतहटय् ५६म्ह, डोटीइ ४६म्ह, कञ्चनपुरय् ४२म्ह, कैलालीइ ३१म्ह, बाजुराय् २७म्ह, बैतडी व गुल्मीइ नीन्याम्ह नीन्याम्ह, नवलपुरय् २३म्ह, कपिलवस्तुय् २१म्ह, प्युठानय् २०म्ह, धनुषाय् १५म्ह, चितवन व सुर्खेतय् झीनिम्ह झीनिम्ह व सुनसरी १०म्हेसित संक्रमण पुष्टि ।
अथेतु, बझाङय् ९म्ह, सिराहा, गोरखा, सिन्धुली, रुपन्देही व लमजुङय् खुम्ह खुम्हेसित, दैलेखय् न्याम्ह, झापा व महोत्तरीइ प्यम्ह, अछाम, सल्यान, नुवाकोट, बाग्लुङ, स्याङ्जा,
नवलपरासी व मुगु छम्ह छम्हेसित संक्रमण खने दुगु खः ।
थ्व नाप आःतक संक्रमितपि ११७५५म्ह थ्यःगु दु । उकि मध्ये २७म्ह सीगु दु । निद्धः व ६९८म्ह डिस्चार्ज जुइ धुकुगु दु ।
