थुगुसीया येँयाःपुन्हि क्वचाल
लहनान्यूज | ञलागा चर्तुर्थी ११४१, असोज ९ शनिबाः
स्वनिगःया थीथी थासय् हनीगु येँयाःपुन्हि क्वचाल, येँय् नानीचायाः कथं रथ जात्रा अले ख्वपय् पुलुंकिसी अले मूपात्रायात नगर परिक्रमा याकाः जात्रा क्वचायेकल ।
येँय् नानीचायाः यानाः म्हिगः येँयाः क्वचायेकूगु दु । म्हिगः स्वनिगःया ऐतिहासिक कुमारी माजुया रथयात्रा यानाः जात्रा क्वचायेकूगु खः । येँयाःयात ईन्द्रजात्रा न धायेगु याः ।
भाद्र द्वादशीया दिं हनुमानध्वाखाय् यःसिं धस्वाकाः औपचारिक रुपय् सुरु याइगु येँयाःया म्हिगः लिपांगु दिंकुन्हु यःसिं क्वःथःगु दु । म्हिगः म्वाःम्ह देवी कुमारी, गणेद्यः अले भैरवया रथ कुमारी छेँय् न मिसातय्सं सालेगु परम्परा दु ।
म्हिगः रथयात प्याफः, यट्खा, नरदेवी, किलागः, इन्द्रचोक, मख्खन, हनुमानध्वाखा जुयाः हाकन कुमारी छेँय् थ्यंकेहःगु खः ।
थ्वहेदथुइ लाखे, पुलुकिसी, अष्टमात्रिका, देवी, हलचोक आकाश भैरबया तान्त्रिक प्याखँ क्यंगु खः । मध्यचान्हय् जात्रा क्वचायेकूगु खः ।
थ्वहेदथुइ श्वेत भैरव, बाकादे भैरव व आकाश भैरवलिसेया थीथी मूर्तियात विधिवत् देगलय् प्रतिस्थापन याकूगु दु ।
Categorized in राष्ट्रिय
