थुगुसी नं मचा ब्वज्या जुइगु
लहनान्यूज सम्वाददाता | कौलागा दशमि ११३६ (अक्टोबर २५ २०१६)
न्हूदँया लसताय् भिंद्यःत्वाःया न्हूपुचःपाखें दँयदसं ग्वसाः ग्वयाच्वंगु मचा ब्वाज्या कासा थुगुसी नं यायेत पुचलं तयारी न्ह्याकूगु दु ।
वंगु २०दँ न्ह्यःनिसें पुचलं न्ह्याका वयाच्वंगु मचा ब्वाज्या थुगुसी नं न्ह्याकेत मयजु रीतु स्थापितया कजिसुइ ५ दुजःया तयारी कमिति नीस्वनेगु ज्या जुल ।
वइगु कौलागा आमै लक्ष्मी पूजाया दिनय् बसन्तपुलिं २०क्वःगु मचा ब्वाज्या न्ह्याइगु न्हू पुचलं न्ह्यथंगु दु । ग्वसाः खलकं सुथसिया ७ः३०ताः इलय् ब्वाज्या न्ह्याकेगु धाःगु दु ।
ब्वाज्या बसन्तपुलिं न्ह्यानाः जुद्ध शालिक, ओमबहाः, लगं, ज्याःबहाः, न्हूघः क्वहिति जुयाः भिंद्यःत्वालय् थ्यंकाः क्वचाइ । कासाय् ५दँनिसें १०दँ तक्कया मचातयसं ब्वति कायेफइगु पुलचं न्ह्यथंगु दु ।
Categorized in राष्ट्रिय
