नेपाल वन पैदावार उद्योग व्यवसायी महासंघया ज्याझ्वलय् वनमन्त्री आलें सिमायात झीसं अक्सिजन बीगु व सिमां झीत कार्वन डाइअक्साइड बीगु खँ नवात । झीत सिमां अक्सिजन बीगु व झीसं सिमायात कार्वन डाइअक्साइड बीगु खँ स्कूलय् चीधंगु क्लासय् ब्वनीपिं मस्तय्सं तक नं सियाच्वनी । तर नेपाल सरकारया जिम्मेवार मन्त्रीं अःखः नवानाब्यूबलय् व भाषणया भिडियो भाइरल नं जुल, मन्त्रीया वदनामी नं जुल । थःगु भाषणयात तोडमरोड यानाः थःत वदनाम याय्त स्वःगु धकाः मन्त्री आलें थःगु स्पष्टिकरण बीत स्वल ।

 

अनं वल शिक्षामन्त्रीया खँ । शिक्षामन्त्रीं शिक्षाया विकासया खँ ल्हाय्माःगु खः । तर विद्यार्थीतय् दिक्षान्त समारोहलय् थ्यंम्ह मन्त्री राजनीतिक भाषण बिल, व नं तुच्छ पहः वःगु ‘माइकलाल’ आदि थुज्वःगु खँग्वः छ्यलाः । न्ह्यागुं दबूयात थःगु राजनीतिक प्रचार प्रसारया दबू खंकेगु नेतातय् पहःप्रति वय्कःपिं सचेत जुइमाःगु खः । गन छु नवाय्गु धइगु थुइकेमाःगु खः । तर व ला मजू मजू, विद्यार्थीतय् दथुइ नं पार्टीया खँ, थःथःगु दम्भया खँ ब्वय्गुलिइ वय्कःपिं केन्द्रीत खनेदत।

 

नेतातय्सं बांलाःगु ज्या याःसा, थःगु जिम्मेवारी पूवंकुसा थवंथवय् ब्वः बियाजुइ, आरोप प्रत्यारोप यानाजुइ आवश्यक हे जुइमखु । अले थुकथंया गैर जिम्मेवार अभिव्यक्तिया भिडियो भाइरल नं जुइमखु, स्पष्टिकरण बियाच्वने आवश्यक नं जुइमखु।