थौंनिसें देय्न्यंक भेरोसेल खोपया न्हापांगु मात्रा बीगु
ञंलाथ्व चतुर्दशी ११४१, असोज ४ सोमबाः
सरकारं थौंनिसें कोरोनाविरुद्धया भेरोसेल खोपया न्हापांगु मात्रा बीगु जूगु दु ।
जिल्ला कथं थीथी दँ पुचः क्वःछिनाः खोप बीगु तयारी पूवंगु दु । थौंनिसें १४ गतेतक्क खोपया न्हापांगु मात्रा बीत्यंगु खः । थीथी इलय् न्हापांगु डोज कयाः निगूगु डोज काये त्वःफ्यूपिन्त नं थौंनिसें खोप बीत्यंगु दु ।
स्वास्थ्य मन्त्रालयं खोप काये ल्यं दुगु दक्वं दँ पुचःयात खोप बीत्यंगु खः । तर दक्वं जिल्लाय् छक्वलं दक्वं दँ पुचःयात धाःसा खोप बीमखु ।
ताप्लेजुङ्, संखुवासभा, सोलुखुम्बु, रसुवा, हुम्ला, जुम्ला, मुगु, डोल्पा, बाजुरा र दार्चुला जिल्लाया १८ दं च्वय्या खोप काये त्वःफ्यूपिं दक्वं मनू, काभ्रे व चितवनया ३५ दं च्वय्या दक्वं मनू, स्वनिगःलिसें मकवानपुर, रामेछाम, अछाम व सर्लाही जिल्लाया ४०दं च्वय्या दक्वं मनूतय्त खोप बीत्यंगु दु ।
अथे हे, मनाङ्, मुस्ताङ्, रुकुम पूर्व वाहेकया ५५ जिल्लाय् ४५ दं च्वय्या मनूतय्त खोप बीगु न्ह्यथंगु दु । स्वास्थ्य मन्त्रालयं थ्व हे पुचःया लागिं कात्तिक ४ निसें १४ गतेतक्क निगूगु डोज खोप बी । सरकारं लिपांगु खुसी चीनं ६० लख डोज भेरोसेल खोप हःगु खः ।
Categorized in राष्ट्रिय
