थौंनिसें ५न्हू तक्क ब्वंमियात कोरोना विरुद्धया खोप बिइत्यंगु दु ।

देय्यंकया ब्वनेकुथिइ भौतिक उपस्थितिइ पठनपाठन बन्द जूसा नं खोप बिइगु प्रयोजनया नितिं ब्वनेकु चालिगु जूगु दु । शिक्षा, विज्ञान तथा प्रविधि मन्त्रालयं खोप कायेगु त्वफिउपिं १२दँ निसें १७ दँ वैंशया ब्वंमियात माघ निसें २० तक्क ब्वनेकुथिइ हे खोपया व्यवस्था यायेत निर्देशन बिउगु खः ।

उगु हे कथं स्थानीय तहं सूचं जारी याना खोप कायेत आह्वान याःगु दु । येँ महानगरपालिकां ब्वनेकु खोप अभियान सञ्चालन जुयाच्वंगुलिं खोप कायेत त्वफिउपिं ब्वंमिया विवरण अद्यावधि यान ब्वनेकु व लिक्कसंया खोप केन्द्रय् खोप कायेत निर्देशन बिउगु दु ।

उकिया नितिं स्थानीय तहया वडाय् दूगु सामुदायिक सहरी स्वास्थ्य क्लिनिकलिसे समन्वय यायेत ब्वनेकुयात धाःगु दु । १२ दँ निसें १७ दँ वैंश पुचःया ब्वंमियात मोडर्ना खोप बियावःगु दु ।

थ्वयान्ह्यः २७ पुस निसें १५ माघ तक्क फुक्क ब्वनेकु बन्दया  निर्णय जूगुलिइ ताहाक याना माघ मसान्ततक्क कायम याःगु दु । खोप काःगु सुनिश्चित यायेधुंका परीक्षा सञ्चालन यायेगु सरकारया तयारी दु ।

Categorized in राष्ट्रिय