थौंनिसें सोह्रश्राद्ध न्ह्यात
लहनान्युज | ञलाथ्व प्रतिपदा ११४१, असोज ५ मंगलबाः
थौं निसें पितृपक्ष धायेकि सोह्रश्राद्ध न्ह्यागु दु ।
आश्विन कृष्ण प्रतिपदा निसें आश्विन शुक्ल प्रतिपदा तक्कया १६गू तिथिइ मदुम्ह पितृयात सम्मान लिसें पिण्डदान, तर्पण व सिदादान याइगु जूगुलिं थुगु पक्षयात पितृ पक्ष लिसें सोह्रश्राद्ध धायेगु याःगु खः ।
पितृ पक्षया न्हापांगु दिं थौं प्रतिपदा तिथिया श्राद्ध जुइ । सनातन धर्मावलम्वीतयेसं छुं नं यज्ञ यज्ञादि लिसें तःधंगु नखःचखः न्ह्यः पितृया लुमन्ति यायेगु शास्त्रीय परम्परा कथं मोहनि नखः न्ह्यः पितृ श्राद्ध यायेगु याः ।
थुगु इलय् पितृं सन्तानतयेपाखें आश याना च्वनिगु धइगु शास्त्रीय मान्यता दु । थुगु इलय् पितृ कर्म मयाःसा पितृतयेसं श्राप बिइगु धइगु शास्त्रीय बचं नं दु । थुगु इलय् थी थी तीर्थस्थलय् श्राद्ध याइपिनिगु म्वःम्वः जुइगु याःगु दु ।
मेपिनि छेँय् बालं च्वंपिन्सं धाःसा तीर्थय् वना श्राद्ध यायेमाःगु सँस्कृतिविद्पिनि धापू दु । थुगु ई दुने कारणवश सोह्र श्राद्ध याये मफूसा कार्तिककृष्ण औँसी धायेकि लक्ष्मीपूजाया दिं यायेफइ ।
थ्व खुसिइ पशुपति क्षेत्र विकास कोषं पशुपति क्षेत्रय् श्राद्ध याइपिनि पुरेतपिनि नितिं दसिपौ क्यनेमाःगु व्यवस्था दु ।
Categorized in राष्ट्रिय
