थौंनिसे सरकारी ज्याकू निगु सिफ्टय् चले जुइगु
लहनान्युज | तछलागा दशमी ११४०,असार १ सोमवाः
थौं न निसे सरकारी ज्याकू निगु सिफ्टय् चले याइगु जूगु दु । न्हापांगु सिफ्ट सुथय् ८ बजे निसे १ बजे तक निर्धारण याःगु दु । अथेहे निगू सिफ्ट न्हिनेसिया १ बजे निसे ६ बजे तक याये त्यःगु खः ।
लकडाउनया कारण ८३ दिं तक बन्द जूयाच्वंगु देय् यकंया सरकारी ज्याकू सरकारं असार १ निसे खोले यायेगु थ्व स्वया न्ह्यः निर्णय याःगु खः । कर्मचारीपिन्स भौतिक दुरी कायम याना व स्वास्थ्य सुरक्षाया उपाय अपने याना ज्या यायेत धाःगु खः ।
स्वास्थ्य मापदण्ड पालना याना सम्बन्धित कार्यालय प्रमुखयात जिम्मेवारी बिःगु दु । सेवाग्राहीपिनिगु भिडभाड जूइगु ज्याकूथिइ टोकन प्रणाली अपने याना, ज्याकूथि दुहा वने न्ह्यः तापक्रम नापे यायेगु व्यवस्था याःगु दु । अथेहे स्यानिटाइजर व मास्क लगे याना नियमपाले यायेत सेवाग्राही व कर्मचारीपिन्स पालना यायेमाः ।
बैंक, वित्तीय संस्था, सहकारी, बीमा सेवा न थौं निसे न्ह्याइ । अथेहे सञ्चालन जुइगु गैरसरकारी तथा निजी क्षेत्रया कार्यालय व शिक्षण संस्थाया ज्याकू तक खः । थुगु ज्याकू निगु सिफ्टय् सञ्चालन यायेत्यःगु खः ।
तत्कालया लागि मनूत हुलमुल जुइगु पठनपाठन, अनुमति दूगु अन्तर्राष्ट्रिय व आन्तरिक उडान, तोके याःगु बाहेकया अन्तर्राष्ट्रिय सीमा नाकापाखे वयेगु वनेगु बन्द याना तःगु दु ।
थ्व नाप तालीम, सेमिनार, सभा, गोष्ठी व हुलमुल जुइगु, सिनेमा हल, पार्टी प्यालेस डान्सबार, मनोरञ्जनस्थल, सार्वजनिक पुस्तकालय, सङ्ग्रहालय, चिडियाखाना, शैलुन तथा ब्युटीपार्लर, स्वीमिङ पुल, सपिङ मल, पुचः मुनेगु कासा व खेलमैदान, दक्क प्रकारया धार्मिक तथा सामाजिक थायु, यात्रुबाहक सवारीसाधन न सञ्चालन जुइ मखू ।
