थौं अन्तर्राष्ट्रिय ज्येष्ठ नागरिक दिवस
ञंलागा दशमी ११४१, असोज १५ शुक्रवाः
थौं ३१क्वःगु अन्तर्राष्ट्रिय ज्येष्ठ नागरिक दिवस ।
दँय्दसं अक्टोबर १य् ज्येष्ठ नागरिक दिवस हनेगु याइ । थ्व झ्वलय् नेपालय् नं थीथी ज्याझ्वःत यायेत्यंगु दु । सरकारं थुगुसीया ज्येष्ठ नागरिक दिवसया नारा ‘दक्वं बैंश पुचःया लागिं विद्युतीय प्रविधिया छ्यलाय् समानता’ धइगु क्वःछ्यूग दु ।
लिपांगु छुं दँनिसें ज्येष्ठ नागरिकतय् हकहीत व सम्मानय् छुं पलाः न्ह्याकूगु जूसां थ्व ख्यलय् अझं यक्व ज्या यायेमानिगु अवस्था दु । नेपालय् २०५१ सालय् लय् सच्छि तका वृद्धभत्ता बीगु न्ह्याकूगुलिइ आः उगु भत्ता लय् प्यद्वः तका थ्यंकूगु दु ।
अथे हे, ज्याथः नागरिक म्हसिका पौ इंगु दुसा उकिया लिधंसाय् सार्वजनिक यातायातय् ५० प्रतिशत छ्यापं बीगु व्यवस्था दु । तर ज्याथःपिं नागरिकतय्त थःगु हे सन्तानं तकं हेला मयाइगु लकस दयेके धाःसा राज्यं आः नं मफुनि ।
थ्व हे दथुइ, प्रधानमन्त्री शेरबहादुर देउवां ज्याथः नागरिकयात अनुभव व व्यवहारय् परिपक्व व्यक्तित्व धासें राज्यं उमिगु हनाय् छुं नं कथं म्ह्वति जुइके मबीगु धयादीगु दु । ज्याथः नागरिकतय् ज्ञान, सीप व अनुभवया देय्या सामाजिक–आर्थिक ह्यूपाः अले विकासया लागिं परिचालन यासें न्हू पुस्ताय् लःल्हायेगु लकस दयेकेत सरकार न्ह्यज्यानाच्वंग दुगु वय्कलं धयादीगु दु ।
Categorized in राष्ट्रिय
