२०७८ कार्तिक १०, बुधबार

थौं कूछि भ्वय्

लहनान्यूज | कौलाथ्व अष्टमी ११४१, असोज २७ बुधबाः

थौं मोहनि नखःया च्यान्हुया दिं अथेधइगु कूछि भ्वय् ।
 
थौंकुन्हु महाअष्टमीया बहनी केराहःलय् तयाः कूछि भ्वय् नयेमाःगु परम्परा दु । कूछिया अर्थ निमाना धइगु जुइ । अथेजुयाः थौंया भ्वजय् कूछि बजि दानाः नयेगु यानावःगु दु । गुलिसिनं कूछि भ्वय्यात कूलछिं भ्वय् न धायेगु याः ।
 
कूलछिं धइगु छेँजःया सकलें कूलयाःपिं मनूत धइगु न जुइ । अथेला थौंया भ्वजय् छेँजःया सकलें दुजःपिं अनिवार्य भ्वय् ब्वय् फेतुनाः सहभागी जुइ । मेमेगु ईलय् विस्कं च्वंपिं कूलया दुजःपिं कूछि भ्वजय् मंका कथं भ्वय् नःवयेगु याइ ।
 
नेवाःतय्सं थ्व भ्वय्यात छेँजःया सामिप्यता अप्वयेकाः भातृत्व विकास याइगु कथं स्वीकार यानातःगु दु । थुकियात मेमेगु भ्वय् स्वयां अतिकं महत्व बियाः स्वयातःगु दु ।
 
गन तका धाःसा छेँजःया सुं मनू दिवंगत जूसां सीम्हेसित छथाय् तयाः पालु तयाः जूसां भ्वय् नयेमाः धइगु मान्यता दु ।
Categorized in राष्ट्रिय