थौं खिचापूजा
लहनान्यूज सम्वाददाता | कौलागा चतुर्दशि ११३६ (अक्टोबर २९ २०१६)
नेवाःतय् तःधंगु नखः स्वन्तिया झ्वलय् थौं खिचापूजा याःगु दु ।
थौं कौलागा कृष्ण चतुर्दशिया दिनय् यमराजया दूत कथं नालाः सकसियां छेँय् छेँय् खिचायात पूजा यायेगु याइ । यमपंचक धकाः द्वादशिया दिनय् क्वःयात पुज्यानाः न्ह्याइगु स्वन्तिया निन्हुगु दिनय् खिचा पूजा याइगु खः ।
थौंया दिनय् खिचायात म्हासु सिन्हः, ह्याउँ सिन्हः तिकाः जजंका, स्वांमाः क्वखायेकाः खिचायात यःयःगु मरिचरि नकाः पुज्याइ । नेवाः समाजय् क्वः, खिचा, नाग, सा आदि पशुपंक्षीयात नं पुज्यायेगु, छगू दर्शनं जायाच्वंगु परम्परा खः ।
तता यमुनां थः किजा यमराजयात सःतके छ्वःगु बाखं थुगु नखःलिसे स्वानाच्वंगु दु । तता यमुनां दक्कले न्हापां क्वःयात छ्वयाः किजा यमराजयात सःतके छ्वःगु अले निन्हुगु दिनय् खिचायात छ्वयाः सःतके छ्वःगु किम्वदन्तिया आधारय् यमपंचकया निरन्तरता जुया वयाच्वंगु दु ।
Categorized in राष्ट्रिय
