थौं छक्वलं हे झिंखुम्हेसिके कोरोना संक्रमण पुष्टि
बिकाश | बछलाथ्व एकादशी ११४०
नेपालय् थौं छन्हुं हे १६म्हेसिके कोरोना संक्रमण पुष्टि जूगु दु ।
थौं बाँकेया नेपालगञ्जय् १५म्हेसिके व वीरगंजय् छम्हेसिके कोरोना संक्रमण पुष्टि जूगु खः ।
नेपालगंजय् थौं न्हिनय् जक ९म्हेसिके संक्रमण पुष्टि जूगु खःसा लिपा हाकनं ६म्हेसिके संक्रमण खनेदुगु खः ।
भेरी अस्पतालय् याःगु परीक्षणय् १५म्हेसिके संक्रमण पुष्टि जूगु खः । नेपालगंजय् थौं ८ मिजं व ७ मिसातयके संक्रमण पुष्टि जूगु खः । संक्रमित खनेदुपिंलय् ७दँया मचानिसें ५८दँ तक्कयापिं दु ।
नेपालगंजया बाँकेय् स्वन्हु न्ह्यः संक्रमण पुष्टि जूम्ह ६०दँया मिजंया कन्ट्याक्ट ट्रेसिङ यानाः नेपालगञ्ज उपमहानगरं त्वाःत्वालय् वनाः परीक्षण याःबलय् १५म्ह संक्रमित लूगु धाःगु दु ।
नेपालगञ्ज उपमहानगरया वडा ५, ७ व ८ वडा व नरेनापुर गांपालिका दुनेया थीथी वडाय् ९०म्हेसिया स्वाब परीक्षण याःगुलिइ १५म्हेसिके कोरोना पोजेटिभ खनेदुगु खः ।
संक्रमित १५म्हेसित खजुराया सुशील कोइराला प्रखर क्यान्सर अस्पतालय् यंकीगु धाःगु दु ।
अथे हे, वीरगञ्ज महानगरपालिका वडा नम्बर ३ छपकैयायाम्ह ३६दँया मिजंयाके नं कोरोना संक्रमण पुष्टि जूगु दु ।
वयागु शुक्रबाः स्वाब मुंकाः परिक्षणय् छ्वःगु खः । वयात नारायणी अस्पतालय् भर्ना याःगु न्ह्यथंगु दु ।
थौं संक्रमण पुष्टि जूपिं सकलसिया स्वास्थ्य अवस्था सामान्य दुगु व चिकित्सकया निगरानीइ दुगु धाःगु दु ।
संक्रमित लूगु पर्सा व नेपालगन्जया उगु क्षेत्रयात सिल याइगु जूगु दु ।
थौं १६म्हेसिके संक्रमण खनेदुगु लिसें नेपालय् कोरोना संक्रमितया ल्याः ७५ थ्यंगु दु । उपिंमध्ये १६म्ह वासः यानाः ल्वय् लंकाः छेँय् लिहांवनेधुंकूगु दु ।
ल्यं दुपिं ५९म्हेसिया थीथी अस्पतालय् वासः यानाच्वंगु दु ।
वासः यानाः छेँय् लिहां वनेधुंकूम्ह रौतहटया छम्ह ल्यायम्हयात धाःसा आइतबार हाकनं अस्पताल भर्ना याःगु दु ।
Categorized in राष्ट्रिय
