थौं दशमि, सकसिया स्वां क्वकाइगु
मोहनिया झ्वलय् थौं दशमि अर्थात चालंया दिं ।
 
थौंया दिनय् सकसिया थःथःगु छेँय् वंगु पारुया दिनय् स्वंगु नःलास्वां क्वकयाः थकालिपाखें सिन्हः तिनाः व हे नःलास्वां कायेगु याइ । म्हिगःया दिनय् आगं कोथाय् फयातःगु मोहनि सिन्हः नं धौसिन्हःलिसें हे तीगु याइ ।
 
गुलिसिया थौं हे थःथःगु छेँय् स्वां कायेधुंकाः थःथितिपिन्थाय् नं स्वां काःवनेगु याइ । तर गुलिसिया धाःसा नखत्या सःतीबलय् जक स्वां काःवनेगु चलन नं दु ।
 
आपाःसिया थौं हे चालं जूसां असंया उरायतय् धाःसा कन्हय् जक स्वां क्वकाइ । अथे जुयाः कन्हय् आश्विन शुक्ल एकादशिया दिंंयात असं चालं नं धायेगु याइ ।
 
थौंया दिंयात हिन्दु धर्मावलम्बितय् दुर्गा भवानीं दैत्ययात वध यानाः विजय प्राप्त याःगु दिं कथं कायेगु याःसा वौद्ध धर्मावलम्बितय् सम्राट अशोकं अस्त्रशस्त्र त्याग यानाः थःगु रिष, राग, द्वेषयाके विजय प्राप्त याःगु दिं कथं काइ ।
 
 
  • तलेजु द्यः थहां बिज्याकल
 
 
थौं मोहनिया दशमिया झ्वलय् येँया तलेजु भवानी द्यः नं थहां बिज्याकूगु दु ।
 
तलेजुया मू चुकय् च्वंगु आगं छेँय् बिज्याकाच्वंम्ह तलेजु भवानी थौं च्वय्या तलेजु देगलय् थहां बिज्याकूगु खः । द्यःयात वंगु सप्तमिया दिनय् च्वयया देगलय् नं मूचुकय् च्वंगु आगं कोथाय् कुहां बिज्याकूगु खः ।
 
सुथसिया ९ताः ईया साइतय् द्यःयात थहां बिज्याकूगु खः ।
 
द्यः थहां बिज्याकूबलय् नायःपिनिपाखें नायखिं थानाः, अथे हे गुरुजुपाखें घ्यःइताःया आरती, द्यःब्रम्हूपाखें कपूया आरतीलिसें खड्ग व ढाल ज्वंगु खःसा ज्यापुनीतपाखें बँ पुपुं, सितुं पंचामृत व्हलाः न्ह्यःने न्ह्यःने वंगु खः ।
 
द्यः थहां बिज्याकूगु स्वयेत तःधंगु हे ल्याखय् सर्वसाधारण तलेजुइ थ्यंगु खः ।