थौं देय्न्यंकं भेरोसेल खोपया निगूगु डोज तयेकाच्वन
लहानान्युज | दिल्लागा त्रयोदशी ११४१,साउन २२ शुक्रवाः
थौंनिसें देय्न्यंकं लक्षित पुचःयात कोभिड–१९ विरुद्धया भेरोसेलया निगूगु डोज तयेकाच्वंगु दु ।
वंगु असार २९ गतेनिसें ५५दँ स्वयां च्वयेयापिन्त न्ह्याकूगु खोप अभियान अन्तर्गत भेरोसेलया न्हापांगु डोज तयेकूगु खः । उगु डोज कयाः २१न्हु पूवंपिं सकलेंसिन थौंनिसें निगूगु डोज खोप कायेखनीगु धागु दु ।
स्वास्थ्य सेवा विभागं न्हेगुलिं प्रदेशया स्वास्थ्य निर्देशनालय व ७७गू जिल्ला स्वास्थ्य ज्याकूतया्त खोप अभियान न्ह्याकेत निर्देशन ब्यूगु दु । सरकारं थौंतकयादुने नेपालय् कोभिड– १९ विरुद्धया झन्डै निगू कोती डोज थ्यंकवइगु दाबी याःगु दु ।
निगूगु डोज खोप काःपिन्सं अनिवार्य रुपय् विद्युतीय दर्ता नम्बर वा खोप कार्ड क्यनेमालीगु धागु दु । अत्यावश्यक सेवाय् ज्या याइपिनिगु नितिं प्रसुति गृह थापाथली, काठमाडौं मेडिकल कलेज सिनामंगल, निजामती अस्पताल मिनभवन, शिक्षण अस्पताल महाराजगञ्ज व राधास्वामी आइसोलेसन सेन्टर सामाखुसीइ खोप तयेकेगु व्यवस्था यानातःगु दु ।
विदेशय् ज्या यायेत वनीपिन्त नेपाल प्रहरी व वीरेन्द्र सैनिक अस्पतालय् खोप केन्द्र क्वःछिनातःगु दु ।
Categorized in राष्ट्रिय
