स्वन्ति नखःया स्वन्हुया दिं थौं लक्ष्मीपूजा । सनिलय् धनधान्य, ऐश्वर्य व सम्पन्नताया देवी महालक्ष्मीया पूजा आराधना यानाः श्रद्धा भक्तिपूर्वक लक्ष्मीपूजा यायेगु परम्परा दु ।

यचुपिचु यानाः बँ थिलाःतःगु छेँय् लक्ष्मीं बास याइगु मान्यता दु । थ्वहे लिधंसाय् थौं सुथय् छेँ न्ह्यःनय् चुकय् अले लँय् यचुपिचु यानाः साया गोबरं बँ थिलाः लक्ष्मी दुकायेगु चलन दु । छेँया झ्याः, लुखा, कोठा, कःसिनिसें स्वाहांनय् यचुपिचु यानाः दिपावली याइ ।

थ्व पर्वयात दिपमालिका न धाः । लक्ष्मीपूजा याइगु थौंया चान्हय्सित सुखरात्री न धाः । दछियंकं हनीगु प्यंगू मूमू रात्री मध्ये शिवरात्री, मोहरात्री, कालरात्री व सुखरात्री मध्ये कात्तिक कृष्ण पक्ष औंसीया चायात सुखरात्री धायेगु चलन दु ।

थौं सनिलय् छेँ न्ह्यःनय्या चुकनिसें मूलुखा जुयाः लक्ष्मी स्वनाःतःगु थासय् तक साया गोबर व स्यूचां इलाः लक्ष्मीया पलाः दयेकाः लँपु दयेकी । पलाःपतिकं मत च्याकाः झिलीमिली न याइ । दिपावली क्वचायेकाः पूजाकोठाय् मत, कलश व गणेद्यःनाप लक्ष्मी स्थापना यानाः तिसा, ध्यबा, वा, जाकी, सिसाफल व स्वांमाः छायाः विधिपूवंक्क लक्ष्मीया पूजा याइ ।

लक्ष्मीपूजालिपा म्ह्याय् मस्तय्त लक्ष्मीया प्रतीक भापियाः पूजा यानाः दक्षिणा तकं बीगु प्रचलन दु । थौंहे सनिलय्निसें भैलो म्हिती । भगवान् विष्णुं बलिराजायात यमपञ्चकया न्यान्हुकुन्हु स्वर्ग, मत्र्य व पाताल स्वंगुलिं लोकया शासन यायेफइगु कथं वरदान बियादीगु जनविश्वास दु ।

अनलिं वरदान चूलाकूम्ह बलिराजां भलो जुइमा धकाः छेँय्छेँय् थ्व म्ये हायेकूगु लुमन्तिइ भैलो म्हितेगु चलन सुरु जूगु धाइ ।

Categorized in राष्ट्रिय