थौं नेवाः तयेसं गुंपुन्हि व तागाधारीपिन्सं जनैपूर्णिमा तःजिक हनाच्वन
लहनान्यूज | गुंलाथ्व पञ्चमी ११४१, भाद्र ६ आइतबाः
थौं गुंलाथ्व पुन्हि, अर्थात गुंपुन्हि । सकल नेवाःतय् क्वाति त्वनेगु लिसें ब्यांचित जा नकाः गुंपुन्हि हनाच्वंगु दु ।
गुता बूबःया क्वाति दयेकाः त्वनेगु दिं जूगुलिं हे थौंया दिंयात गुंपुन्हि धाःगु धापू नं दु । कय्गू, बकुलाः, भुटी, सिमी लिसें थीथी कथंया प्रोटिनयुक्त बूबः तयाः क्वाक्क त्वनीगु ति जूगुलिं थुकियात क्वाति धाःगु खः । क्वाति त्वनेबले म्हयात तागत दइगु मान्यता कथं क्वाति त्वनीगु खः । गुंलाया ई धइगु रोगव्याधीनिसें थीथी महामारी न्यनेफइगु ई खः । थ्व हे इलय् धार्मिक गतिविधिलिसें क्वाति त्वंसा अज्याःगु रोगव्याधीं मुक्त जुइफइगु विश्वास समाजय् दु ।
व लिसें थौंया दिंयात ब्यांजा नकेगु पुन्हि नं धाः । वा बालीयात रक्षा याइगु विश्वासय् बुँइ वनाः ब्यांचित जा नकःवनेगु चलन दु । व्याचां बुँइ च्वनाः वा बालीयात हानी याइपिं कीनाप मेमेगु हानिकारण चीजं रक्षा याइगु मान्यता दु ।
ब्रम्हू, क्षेत्रीतय् डोरो चीगु थौंया दिं सनातनी नेवाःतय् धाःसा गुंपुचः चीगु याइ । ईकापःका लिसें थीथी ज्वलं प्वःचिनाः हलुखं म्हासुकातःगु कां चिनाः दयेकातइगु गुंपुचः द्यःब्रम्हतय् ल्हातं चीगु याइ ।
थौं हे यलया क्वन्ति महाःद्यःयाथाय् नं मेला जुइ । उगु क्षेत्रय् म्वः ल्हुयाः नीसी यानाः पूजापाठ याइ । सिलु तीर्थ अर्थात गोसाइँगुण्ड वनेमफुपिं थन हे वयाः क्वन्तिया पुखूलिइ म्वः ल्हुइबले सिलु तीर्थय् वंगुति हे धर्म लाइगु तकं धार्मिक मान्यता दु ।
थौं नेपाःया तागाधारी समुदायपिन्सं थौं रक्षाबन्धन अले यज्ञोपवित अर्थात, जनै धारण यानाः थ्व पर्व हनेगु चलन दु । साउन शुक्ल पूर्णिमाया दिंकुन्हु चुडाकर्म यानातःपिं तागाधारी समुदायपिन्सं वैदिक मन्त्रोच्चारणलिसे मन्त्रण यानातःगु यज्ञोपवित धारण याइसा चुडाकर्म मयानीपिं तागाधारी व मेमेगु समुदायपिन्सं नाडीइ रक्षाबन्धन धारण याइ ।
थौं सुथंनिसें खुसि, पुखू अले तीर्थमा वनाः म्वः ल्हुयाः शुद्ध जुयाः विधिपूर्वक जनै व रक्षाबन्धन धारण याइगु खः । जनैया ६गू शिखायात ब्रह्मा, विष्णु, महेश्वर व ज्ञान, कर्म व योगया कथं स्वीकार यानातःगु दु । जनैयात ब्रह्मसूत्र वा ज्ञानया काःया कथं कायेगु याः । राक्षसं लिनातःपिं देवगणतय्तयात गुरु बृहस्पतिं रक्षा विधान तयार यानाः डोरो धारण याकाः संरक्षण याःगु पौराणिक बाखँलिसे थ्व पर्व स्वाः ।
अथेहे वामन अवतारय् भगवान विष्णुं जुजु बलीयात मन्त्र साधना यानातःगु डोरो धारण याकाः वचनवद्ध याकाः स्वंगुलिं लोक काःगु बाखँलिसे न थ्व पर्व स्वाः । थौं काश्यप, अत्रि, गौतम, भारद्वाज, जमदग्मी, वशिष्ठ व विश्वामित्र ऋषियात कुश, हाकुहाम्वः अले जलया तर्पण बिइगु जूगुलिं थ्व पर्वयात ऋषि तर्पणी पूर्णिमा न धायेगु याः ।
पुन्हिया छन्हु न्ह्यः मांबाः मदुपिन्सं सँ खानाः छ्यनय् स व तुलसीया मठय्च्वंगु चा ईलाः म्वः ल्हुइगु अले छछाक जक नयेगु न चलन दु । जनैपूर्णिमा हनेत थौं येँया पशुपतिनाथ, रसुवाया सिलु तीर्थ, यलया क्वन्ति महाद्यःलिसेया थासय् मनूतय् भीड जुइगु याः ।
पशुपतिनाथयात न थौं हे जनै हीकीगु जुयाः मूल पूजारीं छन्हु न्ह्यः हे न्हूगु जनै चिइमाःगु चलन दु । जनै हिलेत भगवान पशुपतिनाथ तकं सिलु तीर्थय् थ्यंकीगु धार्मिक विश्वास दु ।
