थौं पृथ्वीलिसे तिमिला दक्कले सतीगु दिं
लहनान्यूज सम्वाददाता | कछलाथ्व पुन्हि ११३७ (नोभम्बर १४ २०१६)
थौं ६८दँ लिपा तिमिला पृथ्वीलिसे दक्कले सतिकवःगु दिं खः ।
थौं सनिलय् ५ताः ई जुयाः ७ मिनेटय् तिमिला पृथ्वीलिसे ३ लख ५६द्वः, ५सः व ९ किलोमिटर जक तापाःगु खः । थौं मेमेगु दिं स्वयां तिमिला १४ प्रतिशतं तचाः खनेदुगु खःसा मेमेबलय् स्वयां ३० प्रतिशत आपाः जहां थीगु खः ।
आः तिमिला पृथ्वीलिसे मेगु १८दँ लिपा सन् २०३४ नोभम्बर २५य् जक सतिकः वइगु खगोलविदतयसं धाःगु दु ।
थुकथं पृथ्वीलिसे सतिकः वइगु मिलायात महाचन्द्र अथवा सुपर मुन धायेगु चलन दु । थौंया सुपर मुन स्वयेत यक्व हे मनूत पल्लिइ पल्लिइ व लँय् लँय् मुनाच्वंगु खनेदुगु ख: ।
