थौं बालाचःर्हे, बालू वनेगु दिं
लहनान्यूज सम्वाददाता | कछलागा चतुर्दशि ११३७ (नोभम्बर २८ २०१६)
थौं बालाचःर्हे, परीवार दुने मदुपिनिगु आत्माया चीरशान्तिया कामना यासें येँया पशुपतिनाथ क्षेत्रया श्लेषमान्तक वनलिसें देय्न्यंक थीथी शिवालयस सतबीज व्हलाः हनाच्वंगु दु ।
सतवीज व्हलेत सुथंनिसें हे पाशुपत क्षेत्रय् मनूत म्वःम्वः हे मुंगु दु । मार्ग कृष्ण चतुर्दशीया दिनय् सुथय् हे तछ्व, वा, हाकु हाम्वः, छ्व, तू, माय्, चिग्वः कयगू ताय्, लैं, लेबु, हि, सकि व कँयपालु व्हलाः पशुपति क्षेत्र वा शिवालय् चाःहिलेगु याइ ।
बालाचःर्हेबलय् छगः पुसा व्हःसां नं छकुचा लुँति पुण्य दइ धकाः धायेगु याः । बालाचःर्हेया झ्वलय् भक्तजनत वंगु चान्हयनिसें हे मत च्याकाः पशुपतिइ जाग्राम च्वनाच्वंगु दु ।
बालाचःर्हेया दिनय् मृगस्थली वा श्लेषान्तक वनय् व्हःगु सतबीज धयागु मदयावंपिं पितृपिनिगु नितिं पुसा प्यूगु कथं विश्वास याइ । सतबीजं सयावइगु अन्न मदुपिनि नयेखनीगु व इपिं गबलें हे द्यांलायेम्वाःलीगु जनविश्वास दया वयाच्वंगु दु ।
म्हिगः बालाचःर्हेया छन्हु न्ह्यः त्रयोदशिया बाचाय् धाःसा, येँया लुँति अजिमायाथाय् मेमेगु थीथी हलंज्वलं, पशुपंक्षीलिसें ताहाः नं होम याःगु दु । त्रयोदशिया चान्हय् बिष्णुमति खुसि सिथय्च्वंगु लुँति अजिमाया देगः न्ह्यःने दुगु यज्ञकुण्डय् बीबः स्वीनितालिसें बुइँचा, न्या, बखुं, म्येय् छ्यंया लिसें सर्प नं होम यायेगु याइ ।
Categorized in राष्ट्रिय
