थौं यःमरि पुन्हि
लहनान्यूज | थिंलाथ्व त्रयोदशि ११३७ (डिसेम्बर १२ २०१६)
थौं थिंलाथ्व पुन्हि, सकसिया छेँय् छेँय् यःमरि दयेकाः व हे यःमरि नयाः नकाः यःमरि पुन्हि हनाच्वंगु दु ।
थौंया दिनय् न्हूगु वा दुकायेगु याइ । लिसें जाकिचुंया यःमरि, ल्वंचामरिया नापं जाकिचुंया हे कुबेर, लक्ष्मी, गनेद्यः आदि तकं दयेकेगु याइ ।
थौं हे न्हूगु दुकाःगु वालिसें जाकिचुनं दयेकातःगु यःमरि, ल्वंचामरि लिसें द्यःपिं नं कुथिइ तयाः पुज्यायेगु याइ । द्यःपिं नं पुज्यायेगु याःसां विशेष यानाः थौं वा व यःमरि हे पुज्याइयेगु खः ।
येँय् नं पूर्वपाखेया नेवाः लागा पन्तिइ च्वंम्ह सुचन्द्र महाजनया दानी स्वभाव खनाः कुबेरं छंगु कुथिइ अन्न गबलें खाली मजुइमा धकाः वरदान ब्यूगु व वयांलिपा सुचन्द्र महाजनं कुथिइ कुबेरलिसें अन्न तयाः पुज्याःगु व यःमरि दयेकाः सकसितं इंगु धइगु किम्बदन्ति थुगु नखःलिसे स्वानाच्वंगु दु ।
थौं हे पुचः पुचः मुनाः त्यःछिंत्यः फ्वंवनेगु नं चलन दु । थौंकन्हयया ल्यायम्ह पुस्तां थुगु चलन मसियावंगु धासें संस्कृति पुनर्जागरण यायेगु नितिं धकाः नेवाः पत्रकार राष्ट्रिय दबू येँ जिल्लापाखें थौं त्यःछिंत्यः ज्याझ्वः यायेत्यंगु दु ।
दबू, येँ जिल्लाया त्यःछिंत्यः ज्याझ्वः न्हिनसिया ३ताः इलय् इतुम्बहालं न्ह्यानाः येँया थःने व क्वःने लागाय् चाःहिलाः असनय् थ्यंकाः क्वचाइगु धाःगु दु ।
Categorized in राष्ट्रिय
