थौं राष्ट्रिय वा दिवस लिसें सिनाज्या महोत्सव
लहनान्यूज | बछलागा पञ्चमी ११४१, असार १५ मंगलबाः
थौं देय्न्यंक राष्ट्रिय वा दिवस अले सिनाज्या महोत्सव हनाच्वंगु दु ।
थुगुसी दिवसय् सांस्कृतिक, परम्परागत अले मनोरञ्जनात्मक ज्याझ्वः याइमखु । कोरोना महामारी न्ह्यानाच्वंगु दुगुलिं फत्तले सरकारी फार्म दुने हे लिकुनाः दिवस हनेगु तयारी जूगु दु ।
नेपालय् बुँज्या जुइगु कूल बुँया ४७ प्रतिशतय् वा पीगु याः । मुक्कं १४ लख ७३द्वः हेक्टर क्षेत्रफलय् ५६ लख २१द्वः मेट्रिक टन वा सइगु विभागं न्ह्यथंगु दु । थगुनेया तुलनाय् थुगुसी वा उत्पादनया क्षेत्रफल १ प्रतिशत व उत्पादनय् १ दशमलव ३ प्रतिशतं अप्वःगु धाःगु दु ।
थ्व हे दथुइ, असार १५ यात धौबजि नयेगु नखःया रुपं कायेगु नं याः । ज्यां त्यानुचाःपिं किसानतय् शक्ति प्राप्तिया लागिं धौ बजि नयेगु याइ । बुँज्याबाहेक मेगु पेशा व व्यवसायलय् जाःपिं धौ बजि नयाः असार १५ हनी । धौबजिं शरीरयात सिचुयाः शक्ति सञ्चय जुइगु विश्वास याइ ।
वि.सं. २०६१ मंसिर २९ गते मन्त्रीस्तरीय निर्णय यानाः २०६२ साल असार १५ गतेनिसें राष्ट्रिय वा दिवस हनेगु याःगु खः । थुखे, राष्ट्रिय वा दिवसया झ्वलय् कर्णाली प्रदेशय् थौं सार्वजनिक बिदा ब्यूगु दु । कर्णाली प्रदेश सरकारया मन्त्रिपरिषदया निर्णय कथं असार १५ गते वा दिवसया झ्वलय् बिदा ब्यूगु खः ।
कर्णालीया १० जिल्लामध्ये जुम्लाबाहेक ९ जिल्लाया दक्वं सरकारी ज्याकू अले सार्वजनिक ज्याकू, शैक्षिक संस्था, बैंक अले वित्तीय संस्थाय् बिदा ब्यूगु दु ।
Categorized in राष्ट्रिय
