थौं विश्वकर्मा पूजा, कालीगढतय् तःजिक् नख हनाच्वन
ञंलाथ्व एकादशी ११४१, असोज १ शुक्रवाः
थौं असोज १ गते । कालीगढतय् थौं भगवान विश्वकर्माया पूजा यायेगु दिं । थ्व दिनय् थःगु सवारी ज्वलं, कलकारखानाय् अले धातुया मेसीन व ज्याभः आदिया पूजा याइ ।
न्हूगु सवारीसाधन न्याःपिन्सं नं थीथी शक्तिपीठय् वनाः थःगु सवारी ज्वलं पूजा याइ । येँया भद्रकाली, दक्षिणकालीलिसेंया देगलय् दर्शनार्थीत म्वःम्वः मुनेगु याः ।
थीथी कलकारखानाय् विश्वकर्माया फिया मूर्ति वा तस्वीरय् विधि कथं पूजा आराधना यानाः थुगु दिं हनी । थौंया दिनय् कालिगढं छ्यलीगु ज्याभःया पूजा याःसा यक्व ई तुइगु, ज्याया इलय् मस्यनीगु व बांलाक ज्या याये फइगु गुण चूलाइगु धार्मिक विश्वास दु ।
द्वापरयुगय् कृष्ण द्यःयात राक्षसं दुःख बीधुंकाः विश्वकर्मां समुद्रया दथुइ ‘भेद द्वारका’ दयेकाः सुचुकूगु धार्मिक विश्वास दु । छचाया दुने हे समुद्रया दथुइ ‘भेद द्वारका’ दयेकूगुलिं उगु हे इलंनिसें विश्वकर्मायात सफल वास्तुविद्या रूपं कयाः पूजा यायेगु परम्परा न्ह्याःगु नेपाल पञ्चाङ्ग निर्णायक समितिया पूर्व नायः अले धर्मशास्त्रविद् प्रा डा रामचन्द्र गौतमं धयादिल ।
विश्वकर्माया वास्तु विद्याया विशिष्ट ज्ञाताया रूपं काइ । विश्वकर्मा प्रकाश नांया वास्तु शास्त्रया ग्रन्थ वय्कलं हे तयार याःगु विश्वास दुगु वास्तुशास्त्री शिव पोखरेलं धयादिल । थ्व हे लुमन्तिइ नेपालया कालिगढं थौं तःजिक विश्वकर्मा बाबाकया पूजा यानाः वय्कःया विद्वताया सम्मान यायेगु व थथे याःसा थःत नं विश्वकर्माया गुण चूलाइगु विश्वास याइ ।
थ्व हे विश्वासय् थौं इञ्जिन जडान जूगु यन्त्र सवारी ज्वलं तकं पूजा याइ । थौंनिसें शरद ऋतु न्ह्याइगु विश्वास नं दु ।
Categorized in राष्ट्रिय
