थौं सकसिनं ल्वःमंकूगु ‘मस्तयत जुइगु अत्याचार विरुद्धया दिवस’
शिवेश शर्मा | तछलाथ्व त्रयोदशी ११४०
थौं जुन ४ तारिख, ‘मस्तयत जुइगु अत्याचार विरुद्धया अन्तर्राष्ट्रिय दिवस ।’
थौंया दिनय् हलिंन्यक मस्तयत जुइगु शारिरीक वा मानसिक छुं नं कथंया अत्याचारया विरुद्ध सः ल्ह्वनाः थुगु दिवस हनेगु याइ ।
हलिंन्यंक धइथें कोरोनाया महामारी अले नेपालय् नं लकडाउन न्ह्यानाच्वंगुलिं थुगुसी थन छुं हे कथंया औपचारिक ज्याझ्वः मजुल । थुगुसी मस्तयत जुइगु अत्याचार विरुद्ध गनं नं सः मदन ।
बालअधिकारकःमि, कन्सर्न नेपालया नायः विजय सैंजुं थौंया दिनय् सरकारपाखें प्रेस वक्तव्य वा मचातय् नामय् हसना छगू मवयेगु धइगु थुगु ख्यःपाखे सरकार गुलि उदासिन धइगु प्रमाण खःगु धयादिल ।
लकडाउन वा महामारीया हुनिं गनं छुं कथं सः मदंसां लकडाउन व महामारीया हे दथुइ मचातयत हत्या, हिंसा, बलात्कार थुज्वःगु अत्याचार धाःसा जुया हे च्वंगु दु ।
रुकुम–जाजरकोटया नवराज विक हत्या प्रकरणय् एसईई परिक्षा पियाच्वंम्ह छम्ह मचाया तकं हत्या जुल ।
थ्व हे इलय थीथी इलय् थीथी थासय् छेँय् परिवारपाखें हे मिसामचात बलात्कृत जूगु घटना नं खनेदत ।
नेपालय् बालविवाहया औसत दर ४८.५ प्रतिशत दु, गुगु तसकं यक्व हे खः ।
थीथी कथंया यातनां प्रताडित जुयाः मचातयसं आत्महत्या तकं याःगु खँ नं थुगु इलय् न्यनेमालाच्वंगु दु ।
छुं दिं न्ह्यः जक हे कमजोर आर्थिक अवस्थाया हुनिं लहीत थाकुइगु धकाः थः हे मचायात मामं हे स्यानाब्यूगु घटना तकं जुल ।
संख्यात्मक ल्याखं मेमेगु देशय् स्वयां नेपालय् मचातयत शोषण अत्याचारया घटना आपाः हे खनदेगु बालअधिकारकःमि सैंजुं धयादिल ।
‘थन मचातयगु ल्याः हे आपाः दुगुलिं मचातयत अत्याचारया घटना नं आपाः जूगु खनेदु’ सैंजुया धापू खः । ‘नेपालय् लखौं मचात थीथी ख्यलय् बालश्रमिकया रुपं ज्या यानाच्वंगु दु व इमिगु श्रम शोषण जुयाच्वंगु दु । सरकार थुखेपाखे गबले गम्भीर जुइगु ?’
‘देयया कर्णधार जुयाच्वंपिं मचातयगु न्यूनतम आधारभूत आवश्यकता पूवंकेगु व उमिगु जीवनस्तर थकायेत सरकारं पलाः ल्ह्वने लिबाकेमज्यू’ डा. सैंजुया धापू खः ।
ब्वनेकू बन्द जुयाः छेँय हे च्वनेमाःगु व पासापिंलिसे म्हिते नं मखनीगु अवस्थाय् परिवारं आपाः ब्वः मबीगु, थीथी रचनात्मक ज्या यायेत मस्तयत घ्वायेगु, न्हूगु ज्या वा कासाय् अभिभावकं साथ बीगु याःसा उमिगु शारीरिक, मानसिक, अवस्था बांलानावनीगु बाल मनोविद्तय् छ्याता दु ।
जुन २ यात मचातयत जुइगु अत्याचार विरुद्धया दिवस कथं हनेगु चलन सन् १९८२ निसें न्ह्याःगु खः ।
तत्कालिन इलय् ‘लेबानन वार’ न्ह्यानाच्वंबलय् तःम्ह हे मचात युद्धया म्वाःमदुगु यातना फयेत बाध्य जुल ।
व धुंकाः संयुक्त राष्ट्र संघया १९ अगस्ट १९८२ इ जूगु महासभां दँयदसं जुन ४या दिंयात मचातयत जुइगु अत्याचार विरुद्धया दिवस कथं हनेगु प्रस्ताव पारित याःगु खः ।
