नेपाःमिपिनिगु निगूगु तःधंगु नखः स्वन्तिया थौं स्वन्हुगु दिं, किजापूजा यानाः हनाच्वंगु दु ।

दँय्दसं कार्तिक शुक्ल द्वितीयाया दिनय् हनीगु स्वन्तिया मू दिं थौं तताकेहेँपिन्सं दाजुकिजायात किजापूजा यायेगु याइ । तताकेहेँपिन्सं थः दाजुकिजायात श्रद्धा, आस्था व निष्ठा लिसें ताःआयू, आरोग्य व ऐश्वर्य प्राप्तिया कामना यासें परम्परा कथं पूजा याइ ।

थौंया दिंयात यमद्वितीया नं धायेगु याः । लः व चिकंया मन्दः दयेकाः तताकेहेँपिन्सं दाजुकिजायात धौ सगं लिसें ह्याउँक सिन्हः तिकाः ग्वय्स्वाांमः क्वखायेकाः किजापूजा यानाबीगु याइ । किजापूजा यायेगु झ्वलय् तताकेहेँपिन्सं दाजुकिजायात ख्येँय् सगंलिसें सि सगं तकं बीगु याइ ।

सीसगनय् मेमेगु सिसाबुसालिसें भोगत्या व तःसि नं तयेगु याइ । तःकेहेँपिन्सं दाजुकिजायात किजापूजाय यायेधुंकाः दाजुकिजां थः तःकेहेँपिन्त वसःलिसेंया द्वहलपालिसें धेबा तकं बीगु याइ । तताकेहेँपिन्सं किजापूजा यानाबीबलय् अखण्ड सौभाग्य व ऐश्वर्य चूलाइगु शास्त्रीय मान्यता दु ।

म्हं मफयाच्वंम्ह किजायात यमराजं काःवःबलय् ततां किजापूजा छकः नि याये धकाः यमराजयाके उजं फ्वनाः किजापूजा याःगु न्ह्यइपूगु किम्वदन्ति थुगु नखःलिसे स्वानाच्वंगु दु । किम्वदन्ति कथं किजापूजा याःगु खनेधुंकाः लय्ताःम्ह यमराजं तताम्हेसिके वरदान फ्वनेत धाःबलय् चिकं मन्दः मगंतल्ले, ग्वय्स्वां सुकू मचिंतल्ले, ख्वःसिं ध्वमगीतल्ले व तःसि पू मजूतल्ले थः किजायात यंके मदइगु वरदान फ्वंगु धयावःगु दु । किजापूजा यायेगु झ्वलय् थः दाजुकिजा चिरंजीवि जुइमा धइगु कामना यासें अष्टचिरंजीवि नं पूजा यायेगु याइ ।

किजापूजा यायेत छुं नं कथंया साइत स्वयाच्वनेम्वाः । साइत माःपिनिगु नितिं धाःसा सुथसिया ११ताः ई जुयाः २ मिनेटया ई बांलाःगु नेपाल पञ्चाङ्ग निर्णायक समितिं धाःगु दु । राज्य सञ्चालकं धाःसा साइतय् हे किजापूजा यायेमाःगु समितिं न्ह्यथंगु दु । थ्व हे दथुइ दाजुकिजा वा तताकेहेँ मदुपिनि थौंया दिनय् येँया न्हूपुखुलिइ दुगु बालगोपालेश्वर देगलय् दर्शन याःवनेगु प्रचलन दु । बालगोपालेश्वर देगः दच्छिइ थौंया दिनय् जक चायेकेगु याइ ।

थ्वहे दथुई राष्ट्रपति विद्यादेवी भण्डारीं किजापूजाया लसताय् भिन्तुना हसना ब्युसें स्वदेश अले विदेशय् दुपिं सकल तःकेहेँ अले दाजुकिजायात सुख, शान्ति व समृद्धिया लागिं भिंतुना बियादीगु दु ।

स्वन्ति नखलं दक्वं नेपाःमि दथुइ थवंथवय् सद्भाव, सहिष्णुता व भ्रातृत्वया भावना थकासें राष्ट्रिय एकतायात थप सुदृढ दयेकेत ग्वहालि जुइगु विश्वास नं वय्कलं प्वंकादीगु दु । राष्ट्रपति भण्डारीया भिंतुना हसनाय् झःझः धाःगु मतया जलं औँसीयात ख्युंयात त्याकीगु स्वन्ति नखः छगू प्रतिकात्मक उत्सव नं खःगु धयातःगु दु ।

स्वन्ति नखः प्रकृति, मानव जीवन व प्राणी जगतलिसे अन्योन्याश्रित स्वापूयात पिब्वयेगुलिसें तताकेहेँ अले दाजुकिजा दथुइया थवंथवय्या मतिनायात दुग्यंकीगु नं हसनाय्  धयातःगु दु । अथे हे, स्वन्तिया झ्वलय् म्हितीगु देउसी, भैलो विशुद्ध नेपाली तजिलजि जूगुलिं थुकिया मौलिकता ल्यंकेमाःगुलिइ नं राष्ट्रपतिं बः बियादीगु दु ।

अथे हे, किजापूजाया झ्वलय् भिंतुना हसना ब्युसें प्रधानमन्त्री शेरबहादुर देउवां कोभिडविरुद्धका स्वास्थ्य मापदण्डयात लिनाः लसतालिसें नखः हनेत इनाप यानादीगुदु । स्वन्ति थुज्वःगु दाजुकिजा व तताकेहेँया दथुइया माया मतिना अप्वयेकीगु नखलं झी सकसितं हःपाः व लसता बीमा धकाः प्रधानमन्त्री देउवां कामना यानादीगु दु ।

Categorized in राष्ट्रिय